Қарағанды тағы да Қазақстанның халық әртісі, Мемлекеттік сыйлықтың лауреаты Жүсіпбек Елебеков атындағы байқауға халық және дәстүрлі ән орындаушылары жинады. Биылғы жылы шығармашылық байқау мәдениет қайраткерінің 120 жылдығына арналған. Оған Астана, Алматы қалалары мен Қарағанды, Ақмола, Жетісу, Ақтөбе, Атырау облыстарынан 32 үміткер қатысуда.

Жүсіпбек Елебеков атындағы ІХ Республикалық дәстүрлі ән орындаушылар байқауының ашылуы «Сарыжайлау» кинотеатрында өтті. Екі күнге созылатын ән додасы «Шалқыма» концерт залында өтеді.

Байқауға қатысушылардың шеберлігін кәсіби мамандар мен дәстүрлі әндердің танымал орындаушылары бағалайды. Қазылар алқасын Жүсіпбек Елебековтың алғашқы шәкірттерінің бірі - халық әртісі, профессор, музыка пәнінің мұғалімі Қайрат Байбосынов басқарады.

- Даланың ұлы әншісі Жүсіпбек Елебековтің шығармашылық қызметі - ұлттық музыка өнеріндегі ерекше құбылыс. Оның ән мұрасын сақтап, ұрпақтан-ұрпаққа жеткізу керек, - дейді Қайрат Байбосынов.

Байқаудың ашылуында Жүсіпбек Елебеков туралы деректі фильм көрсетілді. Әнші шығармашылығы туралы кітаптың тұсаукесері өтті.

Байқаудың мақсаты - дәстүрлі ән өнерін, ең алдымен, өскелең ұрпақ арасында насихаттау, дейді ұйымдастырушылар.

Жеңімпаздарды марапаттаумен байқаудың жабылу салтанаты 4 қазанда «Шалқыма» концерт залында өтеді. Марапаттаудан соң лауреаттар Гала-концертте өнер көрсетеді.

Жүсіпбек Елебеков атындағы халық әндерін орындаушылардың дәстүрлі байқауы Қарағандыда 1994 жылдан бері өткізіліп келеді.

Жүсіпбек Елебеков 1904 жылы 28 тамызда Қарқаралы уезінің Егіндібұлақ ауылында туған. Әншінің репертуарында қазақтың халық-кәсіби авторлары Сегіз сері, Біржан сал, Ақан сері, Мәди, Ыбырай, Естай, Майра, Жарылғапбердінің белгілі және жарқын туындылары болды. Ол бұл әндерге классикалық мінсіз форма берді. Қазақ драма театрында өнер көрсетті, Қазақ музыка театрында опера әншісі, Қазақ филармониясы мен «Қазақконцерттің» солисі болды. Қазақ эстрада өнері студиясында халық вокалынан сабақ берді.

Ақпарат көзі: ГУ «Аппарат акима Карагандинской области»