Махачкаладағы Халықаралық фестивальде К. С. Станиславский атындағы Қарағанды орыс драма театрының Александр Островскийдің пьесасы бойынша "Доходное место" спектаклі қазылар алқасы мен көрермендердің жоғары бағасын алды. 

Театр форумы Әзербайжан, Қазақстан және Ресейдің ұжымдарын жинады.

"Орыс сахнасы" фестиваліне қатысуға барлығы 80-нен астам өтінім берілді. Өтініштермен бірге театрлар өздерінің қойылымдарының бейнелерін жіберді. Қарағанды драма театры іріктеуден өтіп, фестивальге шақырылды.

Станиславский театрының көркемдік жетекшісі Рача Махатаев мұндай шығармашылық кездесулерге қатысу тек спектакльді көрсету мүмкіндігі ғана емес, сонымен қатар театр сыншыларының пікірлерін тыңдау мүмкіндігі екенін атап өтті.

– Жаңа сахнадағы әрбір қойылым – өркендеу мен дамудың қадамы, – деді ол. – Спектакльдерді кәсіби талдау өте маңызды. Әртістер де өз дағдыларын шыңдауға тырысады, ал басқа театрлардағы әріптестерімен қарым-қатынас жаңа идеялар туғызады, қуат сыйлайды және тәжірибе алмасуға мүмкіндік береді.

Станиславскийдің труппасына сәтті өнер көрсеткені үшін диплом мен мүсінше табысталды.

Театр актрисасы Дина Семененко өз әсерімен бөлісті:

– Дағыстандағы көрермендер бізді өте жылы қарсы алды, біз ұзақ уақыт сахнадан кете алмадық. Театр сүйер қауымның қошеметі мен "браво!" деген айқайы – біздің жұмысымыздың нақты бағасы. Сахна сыртында шығармашылық шабыт атмосферасы болды. Қазылар алқасы – Санкт-Петербург, Томск және Дағыстаннан келген театр сыншылары өте қатал болды.

Алдағы уақытта театр жаңа премьераларын ұсынады: қараша айында "Үш апельсинге деген сүйіспеншілік" қойылымы жоспарланған, ал жаңа жылға балалар да, ересектер де көре алатын "Кірпі мен теңіз" керемет философиялық ертегі дайындалуда.

Ақпарат көзі: ГУ «Аппарат акима Карагандинской области»