Қарағанды облысының ауылдық елді мекендерінде орталықтандырылған сумен жабдықтауға қолжетімділік 97,9%-ды құрайды. Қалаларда бұл көрсеткіш жоғары. Міндет – биыл 100%-ға жеткізу.

Аппарат отырысында энергетика және тұрғын үй-коммуналдық шаруашылық басқарма басшысының орынбасары Дастан Ермекбаев алдағы жоспар жайлы баяндады.

– Мемлекет басшысының орталықтандырылған сумен жабдықтауға қол жеткізуді 100 пайыз қамтамасыз ету жөніндегі тапсырмасын орындау үшін биыл үлкен жұмыс жүргізілетін болады. Қалалардағы 8 жобаға қаражат бөлінді. Қарағанды, Саран, Балқаш және Шахтинск қалаларында 53,5 км желіні салу және қайта жаңарту жоспарлануда. Ауылдық елді мекендерде 7 жоба іске асырылып, 27,6 км су құбыры желісін салу жоспарланған, – деп хабарлады Дастан Ермекбаев.

Тұрғындарының саны аз 32 ауылда суды тазартудың кешенді блок-модульдері орнатылады. Мұндай ауылдардың басым бөлігі Қарқаралы және Ақтоғай аудандарында.

– Біз өңір тұрғындарын жыл соңына дейін сапалы ауыз сумен қамтамасыз ету міндетін алдық. Бұл мәселе ерекше назарды талап етеді және тұрақты бақылауда қалады. Су құбыры желілерін салу және қайта жаңарту бойынша үлкен жұмыстар күтіп тұр, – деп атап өтті облыс әкімі Ермағанбет Бөлекпаев.

Ақпарат көзі: ГУ «Аппарат акима Карагандинской области»