ҚР Қаржы министрінің орынбасары Ержан Біржанов Маңғыстау облысына іссапармен барып, жергілікті халыққа жаңа Салық кодексіндегі өзгерістер жөнінде түсіндірді

Amanat партиясының Маңғыстау облыстық филиалында өткізілген жиынға Парламент Мәжілісінің депутаттары Еділ Жаңбыршин мен Самат Мусабаев, сондай-ақ облыс әкімдігі және жергілікті мәслихат депуттары мен өңірдің қоғам белсенділері қатысты.    

Оның барысында маңғыстаулық іске азаматтар қазір жеңілдетілген салықпен жұмыс істейтінін айтып, жаңа реформада бизнеске қандай преференциялар қарастырылғанын сұрады. Сондай-ақ шағын және орта бизнес өкілдері моноқалаларға төмен пайызды салық тетігін енгізудің амалын пысықтауды өтінді.

Өз кезегінде Ержан Ерікұлы қазір жеңілдетілген салық жүйесінде 1,9 млн адам тіркелгенін жеткізді. Ал бұдан 5 жыл бұрын оның саны 700 мыңның айналасында болған. Демек 3 есеге ұлғайғаны байқалып отыр. Алайда банктер арқылы тексергенде бір кәсіпкердің айналасында 3 серіктестен бар болып шыққаны анықталыпты. «Жаңа заң енгізілгенде салық төлеуден жалтару тыйылатын болады», деді ведомствоның өкілі.

Бұдан бөлек жиын кезінде халықтың тарапынан міндетті әлеуметтік медициналық сақтандыру төлемдеріне қатысты сұрақтар қойылды. Вице-министр тиісті заңға сүйене отырып, төлемдердің қалай аударылатынын мұқият түсіндіріп берді. Әйтсе де медицинаға байланысты мәселелерге басқа құзырлы орган жауапты болғандықтан Қаржы министрінің орынбсары тиісті сауалдарды аталған ведомствоға жеткізетінін айтты.

Тұтастай алғанда, кездесу мазмұнды деңгейде өтіп, барлық азаматтың сұрағына тұшымды жауап берілді.

Ақпарат көзі: Министерство финансов Республики Казахстан