Астанада өткен ЭКОСАИ Оқу комитетінің отырысында Экономикалық ынтымақтастық ұйымы (ЭЫҰ) елдері аудиторларының кәсіби деңгейін арттыру және тиісті оқыту іс-шараларын өткізу мәселелері талқыланды.

ЭКОСАИ Ауғанстан, Әзербайжан, Иран, Қазақстан, Қырғызстан, Пәкістан, Тәжікстан, Түрікменстан, Түркия және Өзбекстан сияқты қатысушы елдердің жоғары аудит органдарын біріктіреді.

Бірлескен оқу іс-шараларын өткізу аудиторларға барлық өзекті бағыттар бойынша тәжірибе алмасуға, өздерінің кәсіби деңгейін арттыруға және мемлекеттік аудит жүргізу әдістерін жетілдіруге мүмкіндік береді.

ЭКОСАИ Оқу комитетінің отырысында Жоғары аудиторлық палатаның мүшесі Нұрлан Нұржанов әлемде болып жатқан қарқынды өзгерістерді ескере отырып, аудит саласындағы дағдыларды үнемі дамыту аса маңызды екенін атап өтті.

«Аудиторлар заман талабына сай озық практикаларды үнемі зерделеп, оларды өз жұмыстарында қолдануы керек», — деді ол.

Жиында ҚР Жоғары аудиторлық палатасы 2025 жылы су ресурстарының тиімділігі аудиті, IT-аудит және жасанды интеллектіні қолдану әдістері бойынша онлайн-тренингтер өткізуді ұсынды.

Отырыста сондай-ақ аудиторларға бұрын өткізілген семинарлар мен тренингтердің нәтижелері жан-жақты талқыланды, сондай-ақ алдағы кезеңге арналған оқу іс-шараларын ұйымдастыру жоспарлары қаралды.

Ақпарат көзі: Қазақстан Республикасының Жоғары аудиторлық палатасы