Астана қаласы Білім басқармасы қалалық әкімдік, прокуратура, полиция басқармасы және кәмелетке толмағандар жөніндегі комиссия мүшелерімен бірлесіп, "Түнгі уақыттағы балалар" атты қала бойынша кәмелетке толмаған жасөспірімдер арасында рейд жұмыстарын жүргізді, деп хабарлайды елорда әкімдігінің ресми сайты.

Іс-шараның негізгі мақсаты - жасөспірімдер қылмысын алдын алу және заң нормаларын түсіндіру.

Шара барысында аулаларда, саябақтарда, жастар көп жиналатын ойын-сауық орындарында рейдтік қадағалау жұмыстары жүргізілді.

Түнде көше кезіп ұсталған жасөспірімдер ішкі істер бөліміне жеткізіліп, ата-аналары шақыртылды. Олардан түсініктемелер алынып, ескертулер берілді.

Айта кетсек, «Түнгі уақыттағы балалар» жедел профилактикалық шарасы жыл сайын дәстүрлі түрде өткізіледі. Қазақстан Республи­касының «Әкімшілік құқықбұзушылық туралы» Кодексіне сәйкес, кәмелеттік жасқа толма­ған балаларға түнгі сағат 23:00-ден үйден тыс жерлерде, сағат 22.00-ден кейін ойын-сауық мекемелерінде ата-анасының және оған құқы бар заңды өкілдерсіз жүруге болмайды. Ол үшін ата-анасы әкімшілік жауапкершілікке тартылады.

Ақпарат көзі: ГУ «Аппарат акима города Астана»