Семейде «AMANAT» партиясынан Абай облысы бойынша сайланған әкімдердің І облыстық форумы өтті. Іс-шараға облыс әкімі Нұрлан Ұранхаев, мәслихат төрағасы Қуаныш Сүлейменов, қала мен аудан әкімдері, басқарма басшылары, депутаттар, қоғам белсенділері, мемлекеттік қызметшілер, аумақтық филиалдың төрағалары мен атқарушы хатшылары, бастауыш партия ұйымының төрағалары, аумақтық әйелдер қанатының кеңесшілері, студенттер мен бұқаралық ақпарат құралдарының өкілдері қатысты.

Форум еліміздің бес аймағында «AMANAT» партиясы алғаш рет өткізіп отырған осындай жиындардың жалғасы деуге болады. Мұндай шараларды өткізу идеясы Президент Қасым-Жомарт Тоқаевтың 2020 жылғы 1 қыркүйектегі Жолдауында айтқан саяси реформалармен байланысты. Сол кезде Мемлекет басшысы ауыл әкімдерін тікелей сайлау қажеттігін жариялап, жергілікті өзін-өзі басқаруды дамытудағы маңызына тоқталған еді. Бүгінде бұл ауылдарға жаңа мүмкіндіктер ашты.

Форумның ашылуында сөз сөйлеген облыс әкімі Нұрлан Ұранхаев ауылды жаңғыртып, әлеуметтік-экономикалық әлеуетін арттырудың маңызы зор екенін атап өтті.

«Ауыл – әр азаматқа қымбат киелі мекен, алтын бесік. Мемлекет басшысы Қасым-Жомарт Тоқаев «Ауыл – ел бесігі. Ауылдағы жағдайды жақсарта алмасақ – бәрімізге сын» екенін атап өтіп, ауылды дамыту мәселесі туралы тиісті Жарлыққа қол қойған болатын. Өткен жылы Үкіметтің қаулысымен ауылдық аумақтарды дамытудың 2023-2027 жылдарға арналған тұжырымдамасы қабылданып, нәтижелі іске асырылып келеді. Абай облысы да ауылдық елді мекендерді дамытуға бағытталған бірқатар жобалар қолға алынды. Инфрақұрылымды дамыту, әлеуметтік қызметтердің сапасын арттыру, кәсіпкерлікті қолдау мәселелерінде жүйелі шаралар қабылдануда», — деді аймақ басшысы.

Сыбайлас жемқорлыққа қарсы іс-қимыл агенттігінің облыс бойынша департаменті превенция басқармасының басшысы Нұржан Толыбеков, ҚР Президенті жанындағы Мемлекеттік басқару академиясы филиалының директоры Әсет Абжақов, Мемлекеттік сатып алу басқармасының басшысы Мақсұт Өмірханов және «018.kz» ақпараттық порталдың бас редакторы Думан Кенжеғазин форум аясында сөз сөйледі.

Облыс әкімінің орынбасары Димитрий Гариков, ардагерлер кеңесінің төрағасы Мұрат Алин, сондай-ақ Курчатов қаласы мен бірнеше ауылдық округ әкімдері баяндамаларында өңірді дамытудың маңызды тұстарына тоқталды.

Бүгінде облыста «AMANAT» партиясынан 133 әкім сайланды. Жыл басынан бері 31 ауылдық округ әкімдеріне сайлау өтті. Жыл соңына дейін тағы төрт ауданда сайлау болмақ.

Ақпарат көзі: Абай облысының әкімдігі