Нью-Йорк, 2024 жылғы 27 қыркүйек – Нью-Йорктегі Біріккен Ұлттар Ұйымының штаб-пәтерінде Қазақстан, Бразилия, Иордания, Қытай, Франция және Оңтүстік Африка Республикасы Халықаралық Қызыл Крест Комитетімен (ХҚКК) бірлесіп, халықаралық гуманитарлық құқыққа (ХГҚ) саяси бейілділікті ынталандыру бойынша жаһандық бастама көтерді.

Барлық континенттерден алты ел бастаған және барлық басқа мемлекеттердің қатысуына ашық бұл бастама қарулы қақтығыстардың теріс салдарын, бейбіт тұрғындардың азабын азайту және азаматтық инфрақұрылымды сақтау мақсатында Женева конвенцияларын құрметтеу, қорғау және сақтау бойынша әрекетті арттыруға бағытталған.

Бастаманы жүзеге асыру шеңберінде алты ел ХҚКК-дан Женева конвенцияларын әмбебап, біркелкі және адалдықпен қолдану және орындау жөніндегі міндеттемені жаңартуға бағытталған практикалық ұсыныстарды әзірлеу үшін барлық мүдделі тараптардың қатысуымен консультациялар өткізуді сұрады.

Консультациялардың нәтижелерін қорытындылау және бекіту үшін 2026 жылы Соғыс кезінде адами құндылықтарды сақтау жөніндегі жаһандық саммит өткізу жоспарлануда.

Барлық елдер ратификациялаған 1949 жылғы Женева конвенциялары қарулы қақтығыстардың құрбандарын қорғау ережелерін белгілейтін халықаралық гуманитарлық құқықтың негізін құрайды.

Бастама туралы толығырақ ақпаратты келесі сілтеме арқылы табуға болады: https://www.icrc.org/en/article/high-level-initiative-international-humanitarian-law-FAQ

Ақпарат көзі: Министерство иностранных дел Республики Казахстан