2024 жылғы 3 қазанда Астана қаласында Қазақстан тарапының төрағалығымен Словакия экономика министрінің орынбасары В. Шимоньяк бастаған өкілді делегацияның қатысуымен экономикалық және ғылыми-техникалық ынтымақтастық жөніндегі Қазақстан-Словакия үкіметаралық комиссиясының 10-шы отырысы өтті.

Словакия делегациясының құрамында 2024 жылғы 4 қазанда Астана қаласында өтетін қазақстан-словак бизнес форумына қатысу жоспарланып отырған 37 компания бар.

Отырыс барысында тараптар сауда-экономикалық ынтымақтастықты, энергетика және өнеркәсіп секторларын дамытуды, қоршаған ортаны қорғауды және табиғи ресурстарды пайдалануды қоса алғанда, екіжақты өзара іс-қимыл мәселелерінің кең ауқымын талқылады. Жаңартылатын энергия көздері, агроөнеркәсіптік кешен және денсаулық сақтау саласындағы ынтымақтастық перспективаларына айтарлықтай көңіл бөлінді.

ҚР Экология және табиғи ресурстар вице-министрі Нұркен Шәрбиев Үкіметаралық комиссияның пленарлық отырысында Словакия Республикасымен ынтымақтастықтың «жасыл» экономика және энергия тиімді технологиялар салаларындағы бірлескен жобаларды іске асыру үшін үлкен әлеуеті бар екенін атап өтті. Бұдан басқа, сауда, өнеркәсіп, білім беру, спорт, көлік, энергетика, сондай-ақ орман шаруашылығы салаларындағы өзара іс-қимылдың ағымдағы және перспективалық бағыттары атап өтілді.

Сонымен қатар, Словакия экономика министрінің орынбасары В. Шимоняк жасыл технологиялар, су пайдалану, қалдықтарды басқару, ЖЭК, орман шаруашылығы және т. б. салалардағы ынтымақтастық перспективаларын атап өтті.

Бұдан басқа, отырыс шеңберінде энергетика, көлік, өнеркәсіп, қорғаныс өнеркәсібі, сауда-экономикалық, инвестициялық ынтымақтастық, метрология, орман шаруашылығы, қоршаған орта және табиғи ресурстар, білім және спорт жөніндегі жұмыс топтарының отырыстары өтті. Осы жұмыс топтарының отырыстары барысында тараптар ағымдағы ынтымақтастықты талқылап, одан әрі перспективаларды белгіледі.

Отырыс қорытындысы бойынша тараптар хаттамаға қол қойды, онда көрсетілген салаларда белгіленген бастамаларды іске асыру жөніндегі уағдаластықтар көрініс тапты. Отырыс екі елдің өзара іс-қимылды тереңдетуге және олардың алдында тұрған сын-қатерлерді бірлесіп шешуге деген ұмтылысын растады.

Ақпарат көзі: Министерство экологии, геологии и природных ресурсов Республики Казахстан