Адам құқықтары жөніндегі уәкіл Артур Ластаев Қазақстанның Ресей Федерациясындағы Елшілігі ұйымдастырған «Отбасы институтын нығайтудағы Қазақстан мен Ресей тәжірибесі: дәстүрлі құндылықтарды сақтау» атты дөңгелек үстелге қатысты.

Шара барысында ана мен баланы қорғау, отбасылық-демографиялық саясат, сондай-ақ отбасын қолдаудың жаңа тәсілдері талқыланды. Артур Ластаев өз сөзінде Қазақстан ратификациялаған отбасы-тұрмыстық қатынастарды реттейтін халықаралық құжаттар мен ұлттық құқықтық актілердің маңыздылығына тоқталды.Әйелдер мен балалардың құқықтарын қорғау шараларына: цифрлық отбасы картасын енгізуге, дағдарыс орталықтарының жұмысына және заңнаманы нығайтуға ерекше назар аударылады.

Сонымен қатар, Уәкіл отбасын дамыту және қорғау саласындағы құқықтық реформалардың жүзеге асырылу барысы туралы баяндады.

Уәкіл отбасылық күрделі мәселелерді шешу үшін профилактиканы күшейту, құқықтық базаны және ведомствоаралық өзара іс-қимылды жетілдіру қажеттігін атап өтті.

«Отбасы және отбасылық құндылықтар – кез келген адамның өмірін құрайтын ең маңызды іргетас. Сондықтан отбасы, ана, әке және бала институтын қорғау, оларды қолдау және нығайту – Қазақстанның және баршамыздың басты міндеттеріміздің бірі», – деді Артур Ластаев.

Кездесу соңында Уәкіл шараны ұйымдастырушыларға алғысын білдіріп, отбасылық құндылықтарды нығайтуға бағытталған шешімдерді бірлесіп іздеу үшін мұндай диалогтардың қажеттігін атап өтті.

Ақпарат көзі: Қазақстан Республикасындағы Адам құқықтары жөніндегі уәкіл