ҚАЗАҚСТАННЫҢ ДАМУЫ ҮШІН БЕЙБІТ АТОМ: ШҚТУ ҒАЛЫМДАРЫ, САРАПШЫЛАРЫ МЕН СТУДЕНТТЕРІ АТОМ ЭНЕРГЕТИКАСЫ САЛАСЫНДАҒЫ ӨЗЕКТІ МӘСЕЛЕЛЕРДІ ТАЛҚЫЛАДЫ

Шығыс Қазақстан техникалық университетінде атом саласындағы ғалымдар мен сарапшылар бакалавр студенттері, магистрант және докторанттармен бірге Президенттің Жолдауын талқылады. Мемлекет басшысы Қасым-Жомарт Тоқаев Қазақстан халқына арналған жолдауында бейбіт атомды дамыту тақырыбына тоқталып, елде АЭС құрылысы бойынша жалпыұлттық референдум күнін 2024 жылғы 6 қазанға белгіледі.

Сондықтан ШҚТУ мамандары мен сарапшылары атом энергетикасы саласындағы өзекті тақырыптарға жауап беру үшін баяндамалар жасады. Студенттерге нақты деректер мен мысалдар арқылы АЭС – бұл ауа райына қарамастан үздіксіз электрмен жабдықтауды қамтамасыз ететін сенімді энергия көзі екендігі түсіндірілді. Сонымен қатар парниктік газдар шығарындыларының төмендеуі, ұзақ мерзімді экономикалық тиімділік сияқты бірқатар артықшылықтары бар екендігі айтылды. Кадрларды даярлау және ядролық ғылымды дамыту мәселесі өзекті болып отыр.

Қазақстанда ядролық ғылым мен технологиялар саласындағы мамандарды даярлау орталығы құрылып жатыр. Ол кәсіби мамандардың тапшылығы және зертханалық базаның тозуы мәселелерін шешуге, сондай-ақ сыни білімді сақтауға бағытталған. «Қазақстан үшін атомдық генерацияны дамыту маңызды. АЭС құрылысы тек көміртегі ізін азайтып қана қоймай, елдің ғылыми-техникалық әлеуетінің өсуіне және жұмыс орындарының ашылуына ықпал етіп, мультипликативті әлеуметтік-экономикалық әсер береді», - деді ШҚТУ Сәулет, құрылыс және энергетика мектебінің деканы Айбек Акаев.

Жалпы көмір электр станцияларының тозуына және электр энергиясын тұтынудың өсуіне байланысты атом энергетикасын дамыту көміртегі бейтараптығының әлемдік күн тәртібіне жауап беретін және Қазақстанның энергетикалық жүйесінің тұрақтылығын қамтамасыз ететін қажеттілікке айналуда.

видео

Ақпарат көзі: Қазақстан Республикасы Ғылым және жоғары білім министрлігі