2024 жылғы 8 маусымда Көкшетау қаласындағы «Абылай хан» алаңында Қазақстан Республикасы ТЖМ Мәлік Ғабдуллин атындағы Азаматтық қорғау академиясының күндізгі оқу факультеті курсанттарының салтанатты шығарылымы өтті. Биыл Төтенше жағдайлар министрлігінің  қатарын 137 жас офицер толықтырды. Сонымен қатар академияның ғылыми-педагогикалық бағыттағы магистранттарының алғашқы түлектеріне оқу бітірді.

Шараға Төтенше жағдайлар министрі генерал-майор Шыңғыс Әрінов, Ақмола облысының әкімі Марат Ахметжанов, академия бастығы полковник Ерлан Әлібеков, азаматтық қорғау органдарының ардагерлері, құқық қорғау және мемлекеттік органдардың өкілдері және басқа құрметті қонақтар қатысты.

Шыңғыс Әрінов өз сөзінде жас лейтенанттарды академияны ойдағыдай аяқтап, бірінші офицерлік шен алғанымен құттықтап, олардың қайсарлығын, ерлік көрсетіп, Отан қорғаушы атағына лайық болуын тіледі.

Өз кезегінде Марат Ахметжанов Ақмола облысы көп жылдар бойы Қазақстан Республикасы үшін де, шетелдік жоғары оқу орындары үшін де азаматтық қорғау саласы мамандарын әзірлейтін  жалғыз өңір екендігін атап өтті.

Шығарылым салтанатының дәстүріне айналған  Әскери Тумен қоштасу рәсімі өтті. Биылғы жылы түлектер атынан құрметті атақ 4 жыл бойы оқу барысында курс старшинасының көмекшісі міндетін лайықты атқарып, академия өміріне белсене араласқан, қатарластарына үлгі бола білген  лейтенант Жауар Мергенге  берілді.

Сонымен қатар Қазақ КСР Өрт сөндіру басқармасының еңбек сіңірген қызметкері, Қазақстан Республикасы Төтенше жағдайлар министрлігі Ардагерлер кеңесінің бірінші төрағасы, полковник Ақпаров Нұрпейіс Ақпарұлы отбасының бастамасымен 2022 жылдан бастап үздік түлекке Ақпаров атындағы шәкіртақы тағайындалады.

Биыл мұндай шәкіртақыға жас лейтенант Илья Верник лайық деп танылды, оны полковниктің қызы Разия Ақпарова табыс етті.  Бұл күні Ақмола облысындағы су тасқынына қарсы  жұмыстарға белсене қатысқан академия курсанттары Ақмола облысы әкімінің алғыс хаттарымен де марапатталды.

Шара соңында түлектер офицерлік қоштасу вальсін билеп,   салтанатты маршпен жүріп  өтті.

Бүгінгі таңда оқу орнында 6 мыңға жуық маман дайындалса, дәл осынша азаматтық қорғау органдарының қызметкері біліктілігін арттыру курстарынан өтті.

Барлық түлектер Қазақстан Республикасы Төтенше жағдайлар министрлігінің аумақтық бөлімшелеріне жіберіледі.

Мәлік Ғабдуллин атындағы

Азаматтық қорғау академиясының баспасөз қызметі

Ақпарат көзі: Министерство по чрезвычайным ситуациям Республики Казахстан