Сәкен Сейфуллин атындағы Қазақ агротехникалық зерттеу университетінде әскери кафедраның кезекті оқуды аяқтаушы курсанттарының әскери ант қабылдау рәсімі салтанатты түрде өтті.

Бұған дейін олар далалық жиыннан өтіп, білімдерін іс жүзінде шыңдаған болатын. Жоғары оқу орны әскери кафедрасының бастығы отставкадағы полковник Төлеген Дуламбаевтың айтуынша, әскери кафедрада даярлықтан өтуге ниет білдірушілер саны жыл сайын артып келеді. 

– Екі жыл оқу барысында студенттер әскери істі меңгеріп, әскери-есептік мамандық алып шығады. Біздің кафедраның кейбір түлектері оқудан кейін Қарулы күштерде, Мемлекеттік күзет қызметінде және ҰҚК Шекара қызметінде әрі қарай қызмет етеді. Кафедра 1958 жылы құрылғандықтан, түлектердің арасында генералға дейін жеткендер бар, – деді ол.

Іс-шараға Қарулы күштердің ардагерлері, курсанттардың ата-аналары мен жақындары қатысты. Әскери ант қабылдау рәсімінен кейін запастағы «лейтенант» атағына ие болған курсанттар салтанатты шерумен жүріп өтті. Қарулы күштер Құрлық әскерлері 68665 әскери бөлімінің жауынгерлері рәсімге қатысушыларға қоян-қолтық ұрыс қимылының элементтерін көрсетті. 

Бүгінде әскери кафедрада үш цикл және он екі әскери-есептік мамандық бойынша дайындық жүргізілетінін айта кету керек. Тактикалық циклге «жалпы әскери бөлімшелерді, бөлімдер мен құрамаларды жауынгерлік қолдану», «топографиялық жұмыстар», «топогеодезиялық қамтамасыз ету бөлімшелері мен бөлімдерін қолдану» кіреді. Арнайы пәндер циклы «көп мақсатты автомобиль техникасын пайдалану және жөндеу», «жалпы әскери мақсаттағы бөлімдер мен құрмалардың автомобиль бөлімшелерін қолдану», «азық-түлікпен қамтамасыз етуді ұйымдастыру» мамандықтарын қамтиды. Запастағы сержанттарды даярлау циклына «атқыш», «гранаатқыш»,  «пулеметші», «автомобилист», «тракторшы» және «автомобиль техникасының электр маманы» әскери-есептік мамандықтары кіреді. 

Әскери кафедра жұмыс істеген уақыттан бері онда 16 мыңнан астам запастағы офицер оқып шықты.

Ақпарат көзі: Министерство обороны Республики Казахстан