Ұлттық экономика вице-министрі Бауыржан Омарбеков Еуразиялық үкіметаралық кеңестің отырысы шеңберінде Минск қаласында (Беларусь Республикасы) өткізілген ЕАЭО-ға мүше мемлекеттердің экономика министрліктері басшыларының 9-кеңесіне қатысты.

Экономика министрліктерінің өкілдері ЕАЭО-ға мүше мемлекеттердің экономикалық дамуының 2035 жылға дейінгі негізгі бағыттарының жобасын және ғылыми-техникалық ынтымақтастық саласындағы Еуразиялық экономикалық интеграцияны дамытудың 2025 жылға дейінгі стратегиялық бағыттарын іске асыруды талқылады.

Б. Омарбековтің айтуынша, Негізгі бағыттар жобасы ЕАЭО туралы шартта және Одақ шеңберіндегі халықаралық шарттарда, ең алдымен кооперациялық өзара іс-қимыл, көлік-логистикалық кеңістік, технологиялық дамудағы ынтымақтастық саласында айқындалған  әлеуметтік-экономикалық дамудың перспективалық бағыттарын қамтуы тиіс.

Сонымен қатар вице-министр біздің еліміз үшін Одақ туралы шартты, атап айтқанда «төрт бостандық» және инфрақұрылымға кемсітусіз қол жеткізу, әділ бәсекелестік, тең құқықтылық және ұлттық мүдделерді есепке алу сияқты негізгі қағидаттарды толық көлемде іске асыру маңызды болып қала беретінін атап өтті.

Экономика министрліктері басшыларының кеңесіне Армения Республикасының экономика министрінің орынбасары Нарек Терян, Беларусь Республикасының экономика министрінің бірінші орынбасары Андрей Картун, Қырғыз Республикасы экономика және коммерция министрінің орынбасары Назарбек Малаев, Ресей Федерациясы экономикалық даму министрінің орынбасары Дмитрий Вольвач, Еуразиялық экономикалық комиссияның интеграция және макроэкономика жөніндегі министрі Сергей Глазьев қатысты.

ЕАЭО-ға мүше мемлекеттердің экономика министрліктері басшыларының кеңесі ЕЭК өкілдерінің қатысуымен Одақтың экономикалық күн тәртібіндегі өзекті мәселелерін талқылау мақсатында 2019 жылдан бері өткізіліп келеді.

Ақпарат көзі: Министерство национальной экономики Республики Казахстан