Жетісу облысының әкімі Бейбіт Исабаев Панфилов ауданына жұмыс сапарымен барып, аймақ тұрғындарымен кездесті. Өңірдің даму барысы туралы баяндап, ауданның алдағы міндеттерін белгіледі, - деп хабарлайды Жетісу облысы әкімінің баспасөз қызметі.

Халықпен кездесу жиынында баяндама жасаған Бейбіт Исабаев ауданның шекаралық аймақ ретіндегі инвестициялық мүмкіндіктері, кәсіпкерлікті дамыту, аграрлық секторды қолдау және басқа да салалардағы аяқ алысын саралап, басым бағыттарына тоқталды. Соның ішінде жауапты тұлғаларға бақ пен жылыжай шаруашылығын дамытуға, өсірілген өнімді өңдеуге инвесторлар тарту, шағын, орта бизнеспен айналысуға ниетті азаматтарға аукцион арқылы жер беру, жердің мақсатты пайдаланылуын қадағалау сияқты бірқатар маңызды міндеттерді тапсырды.

Аудандағы игі істер де назардан тыс қалған жоқ. Мәселен, 9 айда шағын және орта бизнес секторында өнім өндіру мен қызмет көрсету көлемі 72,3 млрд. теңгені құрап, 4,1%-ға өскен. Бизнес субъектілерінен мемлекеттік бюджетке құятын салығының мөлшері былтырғыдан 19,5%-ға артты. Сондай-ақ биыл тұрғын үй беру қарқыны жоғарылаған.

- Салыстырып қарасаңыздар, 2022 жылы ауданда үй берілген жоқ, 2023 жылы 180 отбасына үй берілді, ал биылғы жылдың басынан бері 280 отбасы тұрғын үймен қамтылды, жыл соңына дейін үйлі болатындардың саны 700 адамға жетіп, кезек 5370-тен 4670-ке немесе 13%-ға азаяды. Бұл облыстағы жоғарғы көрсеткіштердің бірі, - деп атап өтті Б. Исабаев.

Жиында инфрақұрылымдарды дамыту, соның ішінде ауыз су, газ, жол мәселелері, әлеуметтік саланы қолдау шаралары, қолға алынып жатқан жобалар жайлы айтылды. Бұл ретте 2023-2024 жылдары ауданға инфрақұрылымдық, әлеуметтік нысандарды салуға, қайта жаңғыртуға және жобалау жұмыстарына облыстық бюджеттен 44 млрд. теңге бөлінген.

Сонымен қатар Бейбіт Исабаев былтыр желтоқсан айындағы кездесуде аудан тұрғындары көтерген 9 проблемалық мәселеге байланысты атқарылған шараларға тоқталды. Атап өтсек, бүгінгі күні 4 мәселе шешімін тапқан. Соның ішінде Басқұншы ауылдық округінің маңындағы 94,6 га босалқы жер учаскелері мемлекет меншігіне қайтарылған. Алмалы ауылындағы қырман күрделі жөндеуден өтіп, қолданысқа берілді. Елтінді батыр атындағы орта мектеп ғимаратын күрделі жөндеуге жобалау-сметалық құжаттама әзірленіп жатыр. Жаркент қаласының Юлдашев көшесі №28 және Жібек жолы көшесі №51 мекенжайларда орналасқан көп қабатты тұрғын үйлердің ауласына ағымдағы жөндеу жұмыстары жасалуда, осы айдың соңында аяқталады. Тағы 5 мәселе бойынша жұмыстар жүріп жатыр.

Сөзінің қорытындысында облыс басшысы ауданның халық саны жағынан ғана емес, кәсіпке бейімділігі, жаңа өзгерістер мен игі жаңалықтарға ашықтығы, мемлекеттік саясатты оңды жүргізуі жағынан да алдыңғы қатарда екенін атап өтіп, аудан жұртшылығына ризашылығын білдіріп, еңбектеріне табыс тіледі.

Мұнан соң тұрғындар өздерін толғандырған сұрақтарын қойды. Мысалы, Басқұншы ауылдық округінің тұрғыны Ұлтуған Насырбекова қолданыстағы жеке наубайханасының қуаттылығын арттырып, іргесін кеңейту үшін Алмалы ауылынан 10 сотық жер қажеттігін айтты. Бұл мәселе жергілікті жерде шешіліп, тиісті жер учаскесі қарастырылатын болды. Сол сияқты бірқатар азаматтар Жаркент қаласындағы Б.Момышұлы атындағы мектепке, Көктал ауылындағы Абай атындағы мектепке, Ләззат Асанова атындағы көшеге жөндеу жұмыстарын жүргізуді сұрады. Осы және қаржыны қажет ететін өзге де ұсыныстар бюджеттің мүмкіндігіне қарай қарастырылатын болады.

Осы күні облыс әкімі азаматтар үшін жеке қабылдау өткізді. Қабылдауға үш азамат кіріп, өз мәселелерін жеткізді. Мәселен, мүгедектігі бар екі баласы мен бір немересін бағып отырған М.Акбарова өткен жылы мемлекеттік тұрғын үй қорынан берілген бір бөлмелі үйінің тарлық етіп отырғанын айтып, оны кеңейту мүмкіндігін қарастыруды сұрады. Тұрғынның жағдайын ескере келе, бір бөлмелі пәтердің орнына қараша айының соңына дейін жылыту жүйесі газға қосылған 3 бөлмелі жер үй беру туралы шешім қабылданды. Сол сияқты қабылдауда көтерілген жүгері өсірушілерге жәрдемдесу, механизатор, комбайншы жұмысшы мамандарын табуға ықпал ету мәселелеріне қатысты нақты жауаптар беріліп, мемлекеттік қолдау шаралары, соның ішінде жұмыспен қамту орталықтары арқылы жұмысшы мамандар тарту мүмкіндіктері түсіндірілді.

Жетісу облысы әкімінің баспасөз қызметі.

 Фотограф: Жеңіс Ысқабай

Ақпарат көзі: Жетісу облысының әкімдігі