Enrive компаниясының Beginit Central Asia халықаралық жобасының жаңа маусымы басталды. Тегін білім беру бағдарламасының миссиясы – өз елі мен әлемін жақсы жаққа өзгертетін әлеуметтік көшбасшылардың ұрпағын тәрбиелеу.

Қарағанды облысының жоғары сынып оқушылары табысты команданың бір бөлігі бола алады. Мүмкіндікті жіберіп алмау керек және іріктеуден өту керек.

"Beginit Central Asia-ға қатысу сізге көптеген мүмкіндіктер ашады. Сіз: әлеуметтік көшбасшының көшбасшылық дағдылары мен құзыреттерін дамыта аласыз; әлеуметтік жобаңызды жүзеге асыра аласыз және өз қауымдастығыңызға нақты әсерді көре аласыз; білім беру сапарлары мен дайындық курстарын қоса алғанда, құнды сыйлықтар ала аласыз; Beginit білім беру платформасына қатысуға іріктеуден өтіп, inVision U университетіне шақыру ала аласыз", – деп атап өтті жоба бастамашылары.

Осы маусымда жоба Қазақстанның 10 облысын және Қырғызстанның бір облысын қамтиды. Қарағандыда іріктеу туры 20 қыркүйекте өтеді.

Өтінімдер 10-сынып оқушыларынан қабылданады. Қатысу үшін сауалнаманы толтыру, сұрақтарға жауап беру және ата-аналардың келісімін алу қажет. 

– Бағдарламаға барынша байыпты қараңыздар, көп жұмыс жасаңыздар және табанды болыңыздар! Beginit Central Asia – бұл жай ғана олимпиада емес, бұл әлемді жақсартуға мүмкіндік. Жоба маған жаңа білім мен достар сыйлады және сіз де үлкен жетістіктерге жете алатыныңызға сенімдімін! – деп кеңес береді өткен маусымның финалисті және жоба жеңімпаздарының бірі қарағандылық Ерасыл Нұрпейісов.

Ерасыл Вeginit Central Asia туралы информатика пәнінің мұғалімінен біліп, бірден әлеуметтік жобаларды әзірлеу идеясына қызығушылық танытқан. Оның "Мектепке қауіпсіз жол" жобасы нағыз жетістік болды. Ол өз аймағындағы көше-жол мәселелерін зерттеп, оларды шешу бойынша ұсыныстар берді.

Сондай-ақ, қарағандылық Әлім Мәлік те құрдастарын қорықпауға және өз күштерін сынап көруге шақырады.

– Жоба маған өзіме сенуге және көшбасшылық дағдыларды дамытуға көмектесті. Мен тиімді қарым-қатынас құруды, өз идеяларымды ұсынуды және нақты мәселелерді шешуді үйрендім. Бұл мен болашақта үлкен мәселелерді шешу үшін қолданатын баға жетпес тәжірибе, – деп бөлісті жобаның финалисті.

Іріктеуден өткен жоғары сынып оқушылары Beginit білім беру платформасында білім алады. Сабақтар 2024 жылдың қарашасында басталып, 2025 жылдың ақпан айының соңына дейін жалғасады. Наурыз айында Үздік қатысушылар үшін Алматыда көшбасшылық дағдыларды дамыту бойынша тренингтер ұйымдастырылады, олардың нәтижелері бойынша финалистер анықталады. Сәуір және мамыр айларында олар әлеуметтік жобаларды іске асыратын болады, ал финалдық кезең Астанада 2025 жылдың маусым айының басында өтеді.

Финал қорытындысы бойынша үздік алты қатысушы жүлдеге ие болады: шетелге білім беру сапарлары, ҰБТ-ға дайындық курстары және компьютерлер. Сонымен қатар, 20 финалистке Алматыда орналасқан inVision U университетіне шақыру беріледі.

Ақпарат көзі: ГУ «Аппарат акима Карагандинской области»