Ақмола облысының әкімі Марат Ахметжанов Целиноград ауданындағы «Жайлы мектеп» жобасы аясында салынып жатқан білім ошақтарының құрылысы барысымен танысты, - деп хабарлайды облыс әкімдігінің баспасөз қызметінен.

Мемлекет басшысының тікелей тапсырмасы аясында «Жайлы мектеп» ұлттық жобасы бойынша Целиноград ауданында 10 мың орындық 7 білім ошағы салынып жатыр. Бұл білім ғимараттары соңғы үлгі бойынша жабдықталады. Яғни, мектептерде заманауи құрал-жабдықтар мен жиһаздар, жайлы кабинеттер және спорт залдар болады. Сондай-ақ, жауапты мердігер ұйымдар білім ошақтарының ауласын абаттандырмақ.

Талапкер және Қараөткел ауылдарындағы мектептерге «KGS Сауда» ЖШС жауапты. Қазіргі уақытта білім ошақтарының аумағы абаттандырылып, технологиялық жабдықтарды орнату жұмыстары жүргізіліп жатыр.

Ал, Ақмол ауылындағы мектепке «УК Строй» ЖШС жауапты. Білім ошағына заманауи құрал-жабдықтар сатып алынып, ішкі әрлеу жұмыстары аяқталды. Қазіргі таңда аумағын абаттандыру жұмыстары басталып кетті. Ал, Қоянды ауылындағы білім ошағын «BI GLobal» ЖШС салып жатыр. Бүгінгі таңда қасбет жұмыстары аяқталып, инженерлік желілер тартылды.

Облыс басшысы «Жайлы мектеп» ұлттық жобасына ерекше көңіл аударып, оның маңыздылығын атап өтті.

«Мемлекет басшысы білім саласына ерекше көңіл бөліп отыр. «Жайлы мектеп» жобасы асяында бөй көтеріп жатқан білім ошақтары талапқа сай әрі балалар үшін қауіпсіз, қолжетімді болуы керек. Білім сапасы да талапқа сай болуы тиіс. Ең бастысы, салынып жатқан нысандар сапалы болуы керек», - деді облыс әкімі.

Жұмыс сапары соңында өңір басшысы Марат Ахметжанов жауапты мердігерлермен және мемлекеттік органдармен кеңес өткізді. Жиын барысында ұлттық жобаны жүзеге асырудағы негізгі мәселелерді, сондай-ақ дайын ғимараттарды қабылдау аспектілерін талқылады.

«Жаңа оқу жылының басында «Жайлы мектеп» жобасы аясында салынған 4 мектепті ашуды жоспарлап отырмыз. Құрылыс жұмыстарынан бөлек кадр мәселесіне де назар аудару қажет. Президент Қасым-Жомарт Тоқаев айтып өткендей, оқыту әдістері жаңашыл және әр балада жеке көзқарас болу керек. Білім басқармасы жаңадан ашылатын мектептердің оқу үдерісін ұйымдастыруды қамтамасыз етіп, педагогикалық және басқа да қажетті кадрларды дайындауы тиіс. Сондай-ақ, оқушылар санын толтыру да маңызды. Сонымен қатар, тамақтандыру, лицензиялық күзет, қауіпсіздік техникасына ерекше көңіл бөліп, шешу қажет. Білім ошақтарындағы қалған қажетті жұмыстарды тездетуді тапсырамын», - деп түйіндеді аймақ басшысы өз сөзін.

Айта кетейік, 2025 жылы өңірде «Жайлы мектеп» ұлттық жобасы аясында 11 мыңға жуық орынға арналған тағы 9 білім ошағы салынатын болады. Бүгінгі таңда осы бағытта 30 гектарды құрайтын жер телімдері бөлініп отыр.

Ақпарат көзі: ГУ «Аппарат акима Акмолинской области»