Қазақстан Республикасы Денсаулық сақтау министрлігінде 5 қыркүйек – Қазақстан халқы тілдері күніне орай  «Тұғыры биік туған тіл» атты дөңгелек үстел өтті.

Дөңгелек үстелді Министрліктің аппарат басшысы Төлеген Сәрсембаев құттықтау сөзімен ашты.

«Өздеріңізге белгілі, Қазақстан Республикасы Үкіметінің қаулысымен «Қазақстан халқы тілдерінің күні» 5-қыркүйек болып жарияланды. Бұл қазақ тілі әліппесінің атасы, қазақ лингвистикасының негізін салушы Ахмет Байтұрсыновтың туған күнімен тұспа-тұс келуі де тегін емес. Сондықтан ұлттық руханиятымыздың ұлықталып, арнайы бір күннің тіл мерекесі болып белгіленуі орынды», - деді Аппарат басшысы.

Сондай-ақ кардиолог, медицина ғылымдарының докторы, профессор, терминолог, тіл жанашыры Мұхамбедия Ахмет-Төре Ахметов «Медициналық терминдер», С.Ж. Асфендияров атындағы Қазақ Ұлттық медицина университеті  қалыпты анатомия кафедрасының лекторы Бауыржан Шәкенов, Астана медицина университеті Филология пәндері кафедрасының меңгерушісі, педагогика ғылымдарының кандидаты Дидар Жарықова және Л.Н. Гумилев атындағы Еуразия Ұлттық  университеті Филология факультеті, Практикалық қазақ тілі кафедрасының доценті, филология ғылымдарының кандидаты Мейрамгүл Жұмәділова баяндама оқып, анатомиялық терминдерді біріздендіру, мемлекеттік тіл мәселесі, аударма жөнінде ой қозғады.

Шара барысында «Мемлекеттік тілді оқыту» бағдарламасы бойынша курсты аяқтаған мемлекеттік қызметшілерге  сертификаттар табысталды.

Мемлекеттік тілді ұлықтауға арналған шара соңында Астана медицина университетінің жас өнерпаздары Ахмет Байтұрсыновтың «Қазақ қалпы», Мұхтар Шахановтың «Төрт ана» өлеңдерін оқып, «Ерке сылқым, «Балбырауын» әсерлі күйлерін тартып өз өнерлерін көрсетті.

Ақпарат көзі: Министерство здравоохранения Республики Казахстан