85 жасында Ақмола облысының денсаулық сақтау саласының ардагері, Көкшетау қаласының Құрметті азаматы Болат Сүлейменұлы Жанәділов дүниеден озды.

Ол өзінің өмірінің 50 жылдан астам уақытын денсаулық сақтау саласына арнап, тек Ақмола облысында ғана емес, бүкіл елде осы саланың дамуына үлкен үлес қосты.Болат Жанәділов 1940 жылы 14 маусымда Көкшетау облысы Айыртау ауданы Қазгородок ауылында дүниеге келген. Қарағанды медициналық институтының емдеу факультетін 1965 жылы бітірген соң, дәрігер-анестезиолог болып еңбек жолын бастады. 1968 жылы Көкшетау облыстық ауруханасының анестезиология бөлімінің меңгерушісі болды.1970 жылы емдеу жұмыстары жөніндегі бас дәрігердің орынбасары болып тағайындалды. 1973 жылдан 1992 жылға дейін – Көкшетау облыстық ауруханасының бас дәрігері болып қызмет етті.1992 жылдың ақпанында Б.Жанәділов Көкшетау облысы әкімшілігі басшысының орынбасары қызметіне ұсынылды. 1995 жылдың қараша айынан 1997 жылдың ақпанына дейін Көкшетау облысы әкімінің орынбасары қызметін атқарды.Болат Жанәділов басшылықта болған жылдары облыстық аурухананың материалдық-техникалық базасы айтарлықтай нығайды, жаңа корпустар салынды, сол кездегі заманауи диагностика және емдеу технологиялары енгізілді. Көкшетауда Болат Сүлейменұлының белсенді қолдауымен «Мейірім» мейірбике күтімінің ауруханасы, жүйке аурулары бар балаларға арналған «Болашақ» оңалту орталығы, медициналық-генетикалық орталық, облыстық қазақ драмалық театры ашылды.1997 жылдан бастап Болат Жанәділов Көкшетау облыстық ауруханасында емхана жұмыстары бойынша бас дәрігердің орынбасары, кейінірек Ақмола облыстық ауруханасының мұражай меңгерушісі болып жұмыс істеді. 2015 жылы 75 жасында зейнетке шықты.Болат Сүлейменұлы Жанәділов – жоғары біліктілік санатындағы дәрігер, Көкшетау қаласының Құрметті азаматы. Ол «Құрмет», «Халықтар достығы» ордендерімен, «Тың жерлерді игергені үшін», «Қазақстан Республикасының тәуелсіздігіне 10 жыл», «Қазақстан Республикасы Конституциясына 10 жыл», «Астанаға 10 жыл», «Тыңның 50 жылдығы» мерейтойлық медалімен, «Денсаулық сақтау үздігі», «И.И. Пирогов 1810–1881 жж.», «Қазақстан Республикасының денсаулық сақтау үздігі» төсбелгілерімен марапатталған.

Болат Сүлейменұлы өзінің басты өмірлік мақсатын жұртшылыққа қызмет ету деп санап, медициналық қызмет көрсету сапасын арттыру, ауруханаларды кадрлармен қамтамасыз ету, заманауи медициналық жабдықтармен жабдықтау бағытында талмай жұмыс істеп, кәсібіни қағидаларына адал болып қалды.Оның жарқын бейнесі туыстарының, әріптестерінің, шәкірттерінің жүрегінде мәңгі сақталады.

Ақпарат көзі: ГУ «Аппарат акима Акмолинской области»