ЕҰУ- ҒА ҚХР БІЛІМ МИНИСТРІ ХУАЙ ЦЗИНЬПЭН КЕЛДІ

  Еуразия ұлттық университетіне Қытай Халық Республикасының Білім министрі Хуай Цзиньпэн келді.

  Кездесу Қазақстан Республикасының Ғылым және жоғары білім вице-министрі Талғат Ешенқұлов, ЕҰУ ректоры Ерлан Сыдықов және ЕҰУ жанындағы Конфуций институтының директоры, проректорлар, факультет декандарының қатысуымен өтті. Ректор Қытай Халық Республикасының Білім министрін қарсы ала отырып, ҚХР университеттерімен ынтымақтастықтың маңыздылығын атап өтті.

  -«Бүгінгі таңда Қытайдың жоғары оқу орындарымен ынтымақтастығымыз Еуразия ұлттық университетін интернационалдандыруды дамытудың басым бағыттарының бірі болып табылады. Қазіргі уақытта біз ҚХР-дың 22 университетімен тығыз байланыстамыз. Биыл Тяньцзинь кәсіптік институтымен бірлесе отырып, ЕҰУ базасында Лу Бань шеберханасын ашу жобасы дайындалды» - деді құттықтау сөзінде ЕҰУ ректоры. Кездесу барысында Тяньцзинь кәсіптік институтының президенті У Цзунбао атқарылған жұмыстар туралы айта келіп, Лу Бань шеберханасын таныстырды.

  «Заманауи жабдықтар шеберхананың әлеуетін арттыруға мүмкіндік береді, бұл күрделі ғылыми зерттеулер жүргізу және білім беру, денсаулық сақтау және өнеркәсіп салаларындағы жаһандық сын-қатерлерді шешу үшін жобалар әзірлеу үшін өте маңызды», - деп атап өтті У Цзунбао мырза.

  ҚР Ғылым және жоғары білім вице-министрі Талғат Ешенқұлов Еуразия ұлттық университетінің базасындағы Лу Бань шеберханасы халықаралық байланысты нығайтып қана қоймай, студенттердің зерттеу және практикалық дайындық сапасын жақсартатынын атап өтті.

  Өз кезегінде сөз алған ҚХР Білім министрі Хуай Цзиньпэн университет ұжымына жылы қабылдағаны үшін алғыс айтып, екі елдің көпжылдық достығының өркендеуі үшін білім және ғылым саласындағы ынтымақтастық қарым-қатынастар одан әрі жемісті болатынына сенім білдірді.

  «Мен кеше Қазақстанның Ғылым және жоғары білім министрі Саясат Нұрбек мырзамен кездесіп, бірқатар маңызды құжаттарға қол қойдым. Еуразия ұлттық университеті жанынан ашылған Лу Бань шеберханасының жұмысына табыс тілеймін, маған қытай тілінде жетік білетін он жасар қазақ баласы қатты ұнады, қытай тілін үйреткен ЕҰУ жанындағы Конфуций институтына ризашылығымды білдіремін», - деді ҚХР Білім министрі Хуай Цзиньпэн.

  Кездесу барысында көрме ұйымдастырылып, екі жақты естелік сыйлықтар алмасты.

видеоматериалға сілтеме

Ақпарат көзі: Қазақстан Республикасы Ғылым және жоғары білім министрлігі