ЕҰУ ОҚЫТУШЫСЫНЫҢ КУРСЫ «COURSERA» ҒАЛАМДЫҚ ПЛАТФОРМАСЫНДА

  ЕҰУ әлеуметтік ғылымдар факультетінің профессоры Айгүл Тұрсынбаеваның «Логика – дұрыс пайымдау ғылымы» атты оқу курсы «Coursera» ғаламдық платформасында орналастырылды.

  Қазақ тіліндегі курс болашақ философтар мен заңгерлерге, гуманитарлық ғылымдар бойынша білімін кеңейткісі келетіндерге де пайдалы болмақ. Оқу курсы рефлексияның формалары мен заңдылықтарын зерттеуге және сыни тұрғыдан ойлау мен талдауды және қорытынды жасауды дамытуға бағытталған.

  «Бұл тек теориялық ғана емес, сонымен қатар ойлау мәдениетін дамытатын және өз ойын анық әрі түсінікті жеткізуге ықпал ететін практикалық курс. Логиканы меңгеру – жай ғана дайын біліммен қарулану емес, ең алдымен дұрыс ойлау заңдылықтарын зерделеу, ақыл-ой мен парасаттылықты меңгеру, дәлелдерді қолдана білу», - деп атап өтті автор.

  Оқыту бейнероликтер, тегін онлайн оқулықтар және тапсырмалар арқылы жүзеге асырылады. Әр модульдің соңында QR код арқылы қосымша материалдар бар. Сонымен қатар қажетті әрі жеткілікті әдістемелік талаптар мен ережелерді де табуға болады.

  Бұл курс Л.Гумилев атындағы Еуразия ұлттық университетінде Цифрлық даму және онлайн оқыту департаментінің заманауи материалдық-техникалық жабдықтарының көмегімен жазылған.

Ақпарат көзі: Қазақстан Республикасы Ғылым және жоғары білім министрлігі