Астанадағы «Белсенді ұзақ өмір сүру орталығында» шахматтан турнир өтті, деп хабарлады елорда әкімдігінің ресми сайты.

Сайыс барысында әр адамға 10 минут және әр жүріске 3 секунд беріліп, 7 тур бойынша 68 қатысушының арасында жеңімпаздар анықталды.

«Сайыс барысында 14 жастан бастап, ардагерлер еркін түрде қатысып, жеңімпазды анықтайды. Осындай орталарда жасөспірімдер тәжірибелі кісілердің ақыл-кеңесін алып, өз өмірлерін дұрыс бағытта қалыптастыруға тырысады. Ақыл-ойдың жарысы саналатын шахмат жас ұрпақты жетілдіріп, отбасылық, мемлекеттік құндылықтарға әсер ететініне сенемін», - деді жарыс ұйымдастырушысы Давид Шарипов.

«Шахмат ойынын тек зейнетке шыққаннан кейін ғана үйрендім. Себебі, денсаулығыма байланысты көп уақытымды ауруханада өткізуге тура келді. Сол жерде шахматты үйренуге ден қойдым. Қазір жемісін жеп жатырмын десем болады. Біріншіден, керемет жүрістер, жеңістер арқылы керемет эмоция аласың. Екіншіден, есте сақтау қабілетім жақсарғандай көрінді. Себебі, жеңіске жету үшін тек қана кездейсоқ ойнау жеткіліксіз. Тұрақты түрде дайындалып отыру қажет. Адам табиғатының ерекшелігі – тек жеңіле бергісі келмейді. Үшіншіден, өзіммен қатар зейнеткерлер ортасымен жақсы тіл табысуға әсер етті. Міне осы артықшылықтарды ескере келе, немелерімді де шахмат үйірмесіне беруді жөн көрдім. Елордадағы шахмат жарыстарын жібермеймін. Орын алмасам да, шахмат атмосферасы ерекше», - дейді Жеңісбек Омаров атты қария.

Айта кетейік, шахмат сайысының жалпы жүлде қоры 100 мың теңгені құрайды.

Ақпарат көзі: ГУ «Аппарат акима города Астана»