Астанада қалалық Жастар саясаты мәселелері басқармасының бастамасымен халықаралық Отбасы күніне орай жас отбасылар арасында «Көңілді старт» отбасылық эстафетасы өтті, деп хабарлады елорда әкімдігінің ресми сайты.

Жарыстың ашылу салтанатына Астана қаласының эстетикалық гимнастика федерациясының президенті Мәдина Бектұрғанова мен Астана қаласы мәслихатының депутаты Динара Байсеркина қатысып, қатысушыларға сәттілік тіледі.

Жас отбасылар арасында спорттық рухты тәрбиелеу және отбасылық қатынастарды нығайту мақсатында өткен жарысқа 30-дан аса жас отбасы қатысты.

Жастар саясаты мәселелері басқармасы Жастар ұйымдарымен жұмыс бөлімінің басшысы Ажар Саргубенованың сөзінше, жарысқа қатысуға жалпы 50-ге жуық өтініш түскен.

«Бүгінгі спорттық жиын жас отбасылар арасында салауатты өмір салтын насихаттауға бағытталған. Отбасылық эстафета жыл сайын өтеді. Бізде «Отбасы – бақыт мекені» жобасы бар. Осы жоба аясында қаламызда жыл соңына дейін бірнеше шара ұйымдастырылады. Бүгінгі сайысқа бізге 50-ге жуық отбасы өтініш білдірді. Қазіргі таңда 30-дан аса отбасы сайысқа түсіп жатыр. Жарыс шарты бойынша отбасылық эстафетаға 35 жасқа дейінгі елордалық жас отбасылар қатысады», - дейді Ажар Саргубенова.

Елордалық Айболаттар отбасы биыл сайысқа екінші рет қатысып отыр.

«Бүгін біз халықаралық Отбасы күніне орай отбасылық жарысқа қатысуға келдік. Жұбайым екеуіміздің жасымыз 34-те. Отбасы құрғанымызға 12 жыл болды. Қазір 4 баланың ата-анасымыз. Бұл жарысқа біз былтыр да қатысып, екінші орынға ие болған едік. Бүгінгі жарысқа қатысып отырған жас отбасылар көп, бірақ біз соған қарамастан жеңіске ұмтылатын боламыз. Жұбайымыз екеуміз таңғы 5-тен 7-ге дейін 10 мың қадам жасау әдетін ұстанып жүрген отбасылардың қатарындамыз. Ауа райына қарамастан спортпен шұғылданып жүрміз», - дейді отағасы Айболат.

Жалпы эстафета екі кезең бойынша өтті. Бірінші іріктеу кезеңінде жас отбасылар ұзындыққа секіру және допты сақинаға лақтыру сайыстарында бақ сынады.

Үздік көрсеткіш көрсеткен 15 отбасы екінші кезеңге жолдама алды. Шешуші кезеңде жас отбасылар жылдам жүгіру және қаппен секіру сияқты 5 түрлі ойынға қатысты.

Жарыс соңында үздік отбасыларға қаржылай сыйлық берілді. Одан бөлек белсенді жас отбасыларға бағалы және пайдалы сыйлық табысталды.

Ақпарат көзі: ГУ «Аппарат акима города Астана»