Республика күніне орай Астанадағы «Хан Шатыр» сауда ойын-сауық орталығында «Елорданың жүз жарқын бейнесі» атты фотокөрме өтіп жатыр, деп хабарлайды қала әкімдігінің ресми сайты.

Көрмеде елорданың тазалығын сақтауға елеулі үлес қосқан қала тұрғындары бейнеленген 100 фотосурет ұсынылған.

Көрмені ұйымдастырушылар елорданың тазалығын сақтау мен абаттандыру жолында еңбек етіп жүрген белсенді азаматтардың үлесін көрсетуді мақсат етті.

«Бүгін біз Республика күніне арналған және «Таза Қазақстан» республикалық акциясына арналған фотокөрменің ашылуына жиналдық. Бұл көрмеде туған жерге, оның тазалығына деген қамқорлық пен мейірімділік көрсеткен адамдардың фотосуреттері қойылған. Мұнда елорда тазалығын сақтауға зор үлес қосқан белсенді қала тұрғындары бейнеленген. Көрменің мақсаты – «Таза Қазақстан» акциясының зор жұмысы мен маңызын көрсету», - деп атап өтті ҚХА хатшылығының және ҮЕҰ-мен жұмыс бөлімінің меңгерушісі Айдана Қамзаева.

Жиынға волонтерлар мен үкіметтік емес ұйымдардың өкілдері белсенді қатысты.

«Мен және менің волонтерлерім елорда тұрғындары мен қонақтарына жыл бойы атқарылған жұмыстарды, мысалы, елордада өткізілетін апта сайынғы сенбіліктер мен түрлі экологиялық шараларды көрсетіп, айтып береміз. Қала тұрғындарының қызығушылығын арттыру үшін мұндай шаралар жиі өткізіліп тұруы керек деп есептеймін», - дейді «Болашақ Қазақстан» жобасының волонтеры Томирис Қапанова.

Ақпарат көзі: ГУ «Аппарат акима города Астана»