Астана, 2024 жылғы 2 қыркүйек – Қазақстан Республикасы Сыртқы істер министрінің орынбасары Әлібек Қуантыров Қазақстандағы Еуропалық одақ Өкілдігінің жаңадан тағайындалған басшысы Алешка Симкич пен Эстония Республикасының елшісі Яап Орадан сенім грамоталардың көшірмелерін қабылдады.

Сұхбат барысында Ә. Қуантыров ҚР мен ЕО арасындағы Кеңейтілген серіктестік және ынтымақтастық туралы келісім шеңберінде Еуропалық одақпен қарым-қатынастың жоғары деңгейін атап өтіп, аса жоғары және жоғары деңгейлердегі саяси диалогтың тұрақты сипаты мен өскен динамикасын, экономикалық ынтымақтастықтың және еліміздегі еуропалық инвестициялар көлемінің айтарлықтай артқанын хабарлады.

Сұхбаттастар көлік және логистика, жұмылғыштық, энергетика, аса маңызды шикізат материалдарын өндіру және пайдалану салаларындағы өзара іс-қимылды іске асырудағы практикалық қадамдарға ерекше назар аударды.

Өз тарапынан еуропалық дипломат Қазақстанның өңірдегі көшбасшылық рөлін жоғары бағалап, стратегиялық серіктестік арнасында өзара іс-қимылды белсенді дамытуға дайындығын білдірді.

Министрдің орынбасары Эстонияның Астанадағы жаңа Елшісін құттықтай отырып, саяси, экономикалық және мәдени-гуманитарлық салалардағы қазақ-эстон қатынастарының үдемелі дамуын қанағаттанушылықпен атап өтті. Сондай-ақ тараптар БҰҰ, ЕҚЫҰ және т.б. халықаралық құрылымдар шеңберіндегі өзара іс-қимыл мәселелерін талқылады.

Кездесулердің соңында Ә. Қуантыров елшілерге Қазақстандағы жұмыстарына сәттілік тіледі.

Еуропалық одақ – Қазақстанның негізгі сауда және инвестициялық серіктесі. ЕО үлесіне қазақстандық сыртқы сауда мен шетелдік инвестициялардың 30%-дан астамы тиесілі.

2023 жылы ҚР мен ЕО арасындағы тауар айналымы 41,4 млрд АҚШ долларын құрады (экспорт – 31 млрд, импорт – 10,4 млрд). Бұл көрсеткіш 2024 жылғы қаңтар-шілдеде 27,9 млрд АҚШ долларын құрады, бұл өткен жылдың сәйкес кезеңімен салыстырғанда 19,2%-ға жоғары (23,4 млрд). Экспорт 23,8%-ға өсіп, 21,6 млрд АҚШ долларын құрады, ал импорт 5,8%-ға өсіп, 6,3 млрд АҚШ долларын құрады. 2005 жылдан бастап Қазақстан экономикасына еуропалық инвестициялардың көлемі 180 млрд АҚШ долларына жетті.

Қазақстан мен ЭР арасындағы тауар айналымы 2023 жылы 157,5 млн АҚШ долларынан асты, бұл 2022 жылғы көрсеткіштерден 29%-ға артық (121,9 млн). 2024 жылғы қаңтар-шілдеде өзара сауда 42,3 млн АҚШ долларын (экспорт – 24,4 млн, импорт – 18,7 млн) құрады, бұл 2023 жылғы сәйкес кезеңнен 56,4%-ға төмен (97 млн доллар).

Ақпарат көзі: Министерство иностранных дел Республики Казахстан