Өңір басшысы Асхат Шахаров Химик стадионының базасында ашылған балалар футбол академиясына барып, нысанның балаларды қабылдауға әзірлігін бағамдады.

Орталық жертөлесі бар екі қабатты ғимараттан тұрады. Онда киім ауыстыратын бөлмелер, спорт залы, демалыс орындары бар. Бірінші қабатта емдеу бөлмесі мен асхана болса, екінші қабатта жатып-демалатын бөлмелер орналасқан. Академияның басты ерекшелігі - бүкіл футбол алаңы жабылған күмбез тәрізді үлкен ауа қысымды құрылымының болуында. Соның арқасында жаттығуларды жыл бойы өткізуге мүмкіндік бар.

Балалар футболын дамыту аясында академияға 6 жастан 18 жасқа дейінгі балалар іріктеледі.

«Мемлекет басшысының тапсырмасы аясында бұқаралық спортты дамытуға көп көңіл бөлінуде. Осы мақсатта біз қажетті инфрақұрылымды дамытып жатырмыз. Ақтөбе өңірінде футбол - ең танымал спорт түрі. Онымен екі мыңнан астам бала айналысады. Олардың ішінен біз осы академияда оқитын ең жақсы ойыншыларды таңдаймыз. Жабық манеж жыл мезгіліне қарамастан, жаттығуларды үздіксіз өткізуге мүмкіндік береді. Мұнда мыңға жуық бала оқи алады. Академиядан шетелдік клубтарда ойнай алатын үздік футболшылар шығуы үшін бар күшімізді саламыз», - деді облыс әкімі академияны аралау барысында.

Ақпарат көзі: ГУ «Акимат Актюбинской области»