ХАЛЫҚАРАЛЫҚ COURSERA ОНЛАЙН ПЛАТФОРМАСЫНА АТЫРАУЛЫҚ ОҚЫТУШЫ КУРСЫН ЕНГІЗДІ

  Биыл ҚР Ғылым және жоғары білім министрлігінің қолдауымен қазақстандық оқытушы-профессор құрамы Coursera әлемдік танымал онлайн платформасына дәрістерін енгізуге мүмкіндік алды.

  Алғашқылардың бірі болып Х.Досмұхамедов атындағы Атырау университетінің аға оқытушысы, менеджмент магистрі Айнұр Тажиденова «Бизнес жоспарлау негіздері» атты онлайн курсын енгізіп бастады. «Бұл курсты студенттер аудиторияға кірмей, қалаған уақытында оқып, дәрістерді тыңдап, тапсырмаларын орындап, сертификаттарын алып келсе, тиісті бағасын алады. Бұл студентке де, оқытушыға да тиімді. Ал мен онлайн курс есебінен босаған уақытымды ғылыми зерттеулерге, мақалалар жазуға арнаймын», - дейді аға оқытушы. Бұл курс әуелі қазақстандық тыңдаушыларға ұсынылып, алдағы уақытта халықаралық деңгейде өзге мемлекеттердің тыңдаушыларына да қолжетімді болады деп күтілуде.

  2024 жылдан бастап Coursera платформасында жасанды интеллект негізіндегі Course Builder – ЖАОК конструкторы қосылды. Course Builder арқылы қысқа уақыт аралығында жаңа курстарды құрастырып, платформадан сәйкес мазмұнды жылдам табуға болады. Бұл өз кезегінде оқытушылар үшін тиімді.

  ҚР ҒЖБМ әлемдік деңгейдегі озық оқу орындарының білім беру платформасын қазақстандық студенттерге онлайн тегін пайдалануға мүмкіндік жасады. Жоба әуелде «Қазақстан халқына» қорының қолдауымен іске асқан. «Министрлік Coursera-дағы әлемнің алдыңғы ондығына кіретін университет профессорларының 100-ден астам курстарын қазақ тіліне аударып, қазақстандық студенттердің оқуына орай тудырды. Осыған дейін Қазақстан бойынша 25 өңірлік университеттердің 47 мың студенті 70 мың курсты игеріп шықты», - дейді Х.Досмұхамедов атындағы Атырау университетінің проректоры Асхат Чукуров. Биылдан бастап аталған жобаға еліміздің 93 жоғары оқу орындары қосылды.

  Coursera жобасын жыл сайын 190 мемлекетте 100 миллионнан астам студент қолданады. Онда әлемнің үздік 225 университетінің танымал курстары тыңдаушыларға қолжетімді. Шетелдік Coursera компаниясымен ҚР ҒЖБМ арасындағы келісім нәтижесінде үздік дәрістер мемлекеттік тілге ұдайы аударылып келеді. 2023 жылы еліміздің 50 мыңға жуық студенті курстарды тегін оқыған.

Ақпарат көзі: Қазақстан Республикасы Ғылым және жоғары білім министрлігі