Ақмола облысында Республика күнін мерекелеу, сондай-ақ «Таза Қазақстан» республикалық экологиялық акциясы аясында Қопа көлінің жағалауына ағаш отырғызу жұмыстары жүргізілді. Іс-шараға өңір басшысы Марат Ахметжанов қатысты. Облыс әкімі орман шаруашылығы қызметкерлерімен және басқа да қатысушылармен бірлесіп 400-ге жуық көшет және 1500 екпе көшет отырғызды. Олардың ішінде қарағай, терек, үйеңкі, долана, тал және басқа да ағаш түрлері бар. Жергілікті экожүйеге үйлесетін көшеттер облыс орталығындағы Қопа көлінің жағалауын безендіретін болады.

Шара барысында Ақмола облысының әкімі экологиялық салауаттылық үшін жасыл желекті сақтау мен ұлғайтудың маңыздылығын атап өтті.     

«Ағаш отырғызу – бұл жай ғана көгалдандыру емес, біздің ортақ болашағымызға қосқан үлесіміз. Біз келер ұрпақ үшін қолайлы жағдай жасаймыз, климатты жақсартамыз және өлкемізді көркемдей түсеміз. Бүгінгі іс-шараға ландшафт дизайнері, орман патологы сияқты тәжірибелі мамандар тартылды, олар ағаштарды дұрыс таңдауға және отырғызуға көмектесуде. Бұл егілген ағаш көшеттерінің тамыр жайып, дұрыс өсіп шығуына септігін тигізеді», - деді Марат Ахметжанов.

Көшеттерді отырғызу кезінде ағаштар мен бұталардың аймақ жағдайына бейім түрлерін таңдауға ерекше назар аударылды. Іс-шараға белсенді қатысқан орманшылар қажетті жағдайларды ескере отырып, әрбір ағашты отырғызу кезіндегі технологияның сақталуын қадағалады.

Копа көлінің жағалауына ағаш отырғызу өмір сүру сапасын жақсартуға және табиғи ресурстарды сақтауға бағытталған аймақтағы көптеген экологиялық бастамалардың бірі болды.

Осы іс-шараның алдағы орман шаруашылығы қызметкерлері күніне де орайластырылғанын айта кетуіміз қажет.

Ақпарат көзі: ГУ «Аппарат акима Акмолинской области»