Бүгін Қазақстан Республикасы Президентінің жанындағы Мемлекеттік басқару академиясында тұрақты инфрақұрылым бойынша үшінші SIPA 2024 Жазғы мектебі басталды. Іс-шараны Орталық Азия университетінің (ОАУ) Мемлекеттік басқару және саясат институты (IPPA) мен Экономикалық ынтымақтастық және даму ұйымы (OECD) ұйымдастырды.

Іс-шарада ҚР Сауда және интеграция бірінші вице-министрі Айжан Бижанова баяндама жасады. Ол көмірқышқыл газының шығарындыларын азайту және сауда секторындағы өнімнің экологиялық тазалығын арттыру мәселелерін талқылаудың маңыздылығын атап өтті.

Қазақстан 2060 жылға дейін көмірді қолданудан бас тарту стратегиясын қабылдаған өңірдегі алғашқылардың бірі болды. Елде таза технологиялар мен инновациялар белсенді түрде енгізілуде, сондай-ақ энергия тиімділігіне инвестиция салуда.

Қазақстанда ЭЫДҰ мен ЕО елдерінің қағидаттарына сәйкес келетін жаңа Экологиялық кодекс енгізілді. Сондай-ақ, Алматы қаласында Климаттың өзгеруі және «жасыл» энергетика бойынша Орталық Азия елдерінің Жобалық кеңсесін ашу мәселесі көтерілді. 

«Бүгінгі тақырып Орталық Азия елдері үшін өте өзекті. Тұрақты инфрақұрылымды талқылау сауда мен бизнестегі жасыл әлеуетті арттыруға айтарлықтай мүмкіндіктер ашады. Еуропалық жасыл мәміле аясында Шекаралық көміртекті түзету механизмін енгізу біздің өндірушілерге белгілі бір міндеттер қояды. Біз көміртегі қолдануды азайтудың маңыздылығын ескере отырып, әсіресе металлургия және химия сияқты салаларда оларды шешу үшін жұмыс істеуге дайынбыз. Біздің көзқарасымыз экологиялық талаптар мен экономикалық орындылық арасындағы тепе-теңдікті іздеуге негізделген. Біз үшін халықаралық саудада өсім қарқыны мен көлемін сақтау маңызды», - деп атап өтті Айжан Бижанова өз сөзінде.

Айжан Бижанова сондай-ақ Еуропалық Одақ 2023 жылы 41 млрд АҚШ долларынан асатын тауар айналымымен Қазақстанның негізгі сауда серіктесі болып табылатынын атап өтті. Қазақстан өз экспортында қайта өңделген өнім үлесін ұлғайту бойынша белсенді жұмыс істейді және экологиялық қауіпсіздік стандарттарын сақтауға ұмтылады. Бұл ретте Еуропалық әріптестер мен ЭЫДҰ өкілдеріне энергия үнемдеу тәжіриебелерін белсенді енгізетін өнеркәсіптік жобаларды жеңілдікпен қорландыруды ұсына отырып, Қазақстанға жасыл технологиялар мен инвестициялар трансфертін ұлғайту мүмкіндігін қарастыруды ұсынды.

Талқылаулар шеңберінде QazTrade-пен бірлесіп дайындалған Шекаралық көміртекті түзету механизмі туралы хабардар ету бойынша ЭЫДҰ ұсынымдарына ерекше назар аударылды. Бұл ұсыныстар қазақстандық экспорттаушыларға халықаралық серіктестердің жаңа талаптарына бейімделуге көмектеседі.

Сөз соңында Вице-министр ЕО-ның тұрақты дамуы және қазақстандық экспорттың өсу қарқынын сақтау жөніндегі мақсаттары арасындағы тепе-теңдіктің маңыздылығын атап өтті.

Сондай-ақ, Германияның Қазақстандағы Елшісі Моника Иверсен баяндама жасады. Ол өз сөзінде тұрақты өндіріс әдістеріне көшу және жаңартылатын энергия көздерін пайдалану Париж келісімі бойынша халықаралық міндеттемелерді орындау үшін ғана емес, сонымен қатар экономикалық тұрақтылықты қамтамасыз ету үшін де маңызды екенін атап өтті.

«Қазақстан экспорттаушылары үшін өз өнімдерінің экологиялық қауіпсіздік стандарттарына сәйкестігіне ұмтылулары маңызды. Тауарлардың «жасылдығы» деңгейі Еуропалық Одақ тарапынан кедендік баждарды белгілеу тұрғысынан маңызды факторға айналуы мүмкін», - деп атап өтті Германияның Қазақстандағы Елшісі Моника Иверсен.

Анықтама: Инфрақұрылымды тұрақты дамыту бағдарламасы (SIPA) Париж келісімінің мақсаттарына және Тұрақты даму мақсаттарына сәйкес келетін энергетикаға, көлікке және өнеркәсіптік инфрақұрылымға инвестицияларды қамтамасыз етуде Орталық және Оңтүстік-Шығыс Азия елдерін қолдауға бағытталған.

Ақпарат көзі: Министерство торговли и интеграции Республики Казахстан