КЛИМАТТЫҢ ӨЗГЕРУ КЕЗІНДЕГІ ЖАҒДАЙЛАРДА ҚОҒАМНЫҢ ТҰРАҚТЫЛЫҒЫН ҚАЛЫПТАСТЫРУ

  ҚР Президенті жанындағы ҚР Ұлттық Ғылым Академиясы Германияның Федералдық білім және зерттеу министрлігімен бірлесіп, «Климаттың өзгеру кезіндегі жағдайларда қоғамның тұрақтылығын қалыптастыру» тақырыбында халықаралық семинар өтті.

  «INCREASE» жобасы аясында өткен іс-шара Германияның 10 ғылыми институттар мен серіктес ұйымдардың өкілдерін, сондай-ақ отандық ЖОО, ғылыми институттар, азаматтық қорғаныс және қала жоспарлау ұйымдарының қатысушыларын біріктірді.

  Шетелдік қонақтардың Германиядан Қазақстанға келудегі мақсаттарының бірі – Орталық Азиядағы (Қазақстан және Қырғызстан) табиғи қауіптер мен тәуекелдерді анықтау, сондай-ақ болашақ ынтымақтастық мүмкіндіктерін талқылау. «INCREASE» жобасының алдын ала нәтижелерін халықаралық сарапшыларға таныстыру, олардың қолданылуы және одан әрі қажеттіліктері жөнінде пікір алу да маңызды. Семинар ғаламдық климаттық өзгерістер контекстінде көптеген қауіптерге байланысты инклюзивті және интегралды стратегияларын талқылауға арналды. Іс-шара барысында қатысушылар табиғи апат қаупін алдын алу мен азайту, сондай-ақ қоғамның төтеп беру қабілетін арттыру жөнінде тәжірибе жұмыстарымен бөлісті.

  Семинар барысында Германия мен Қазақстандағы жұмыстардың үлгілерін көрсететін әр түрлі баяндамалар мен зерттеулер ұсынылды. «INCREASE: Кешенді табиғи апат тәуекелдері. Басқаруды Орталық Азияға ауыстыру» атты воркшоп өтті.

  Іс-шара әл-Фараби атындағы ҚазҰУ-да өткізіліп, талқыланған тақырыптардың академиялық маңыздылығы да атап өтілді. Семинарға қатысушылар ғылыми институттар мен ерікті қауымдастықтардың бірлескен күш-жігері климаттық сын-қатерлерге дайындық пен жауап шараларын арттыра алатынына сенім білдірді. Аталған жоба әр түрлі елдердің ғалымдары мен мамандары арасындағы ынтымақтастықты жалғастыруға және климаттық тәуекелдерді басқаруда жаңа инновациялық тәсілдерді әзірлеуге негіз болады.

Ақпарат көзі: Қазақстан Республикасы Ғылым және жоғары білім министрлігі