Академик Е.А. Бөкетов атындағы Қарағанды университетінің заң факультетінің 26 студенті Қазақстан Республикасының Конституциялық Сотына келіп, сот отырысында бақылаушы ретінде қатысты.

Болашақ заңгерлер университеттің заң факультетінің деканы Абзал Мұхаметжанұлы Серікбаевтың басшылығымен конституциялық іс жүргізудің шарттары мен ерекшеліктерімен практикалық тұрғыдан танысуға мүмкіндік алды.

Студенттер Конституциялық Сот Аппаратының қызметкерлерімен әңгімелесіп, конституциялық бақылау органының қызметі және оның жалпы юрисдикция соттары мен мамандандырылған соттардың өндірісінен айырмашылығы, құқық үстемдігі мен адам құқықтарын қорғау мәселелеріндегі конституциялық бақылаудың рөлі туралы сұрақтарға жауап алды.

Студенттермен кездесу барысында Конституциялық Соттың Төрағасы Эльвира Азимова кәсіби заң кадрларын даярлаудың маңыздылығын және практикалық шаралардың құзыреттілікті тереңдетуге және оқу үдерісіне әсерін атап өтті. Ол заң факультетінің деканы мен оқытушыларын Қарағанды университетіне зерттеу университеті мәртебесін беруімен құттықтап, шығармашылық және ғылыми табыс тіледі. «Бүгінгі Конституциялық Сотқа келулеріңіз сіздерді құқықтық пәндерді тереңірек зерттеуге және жаңа білім алуға шабыттандырады деп үміттенемін. Біз өзара қабылданған меморандум шеңберінде университетпен ынтымақтастықты жалғастыруға және жастардың практикалық дағдылары мен білімін нығайту жөніндегі қызметке қолдау көрсетуге дайынбыз», - деп айтты Төраға болашақ заңгерлерге.

Ақпарат көзі: Қазақстан Республикасының Конституциялық Соты