15 шілдеде ҚР Қарулы күштері командалық пунктері мен басқару пунктерінің мамандары кәсіби мерекелерін атап өтеді. Бұл атаулы күн Қорғаныс министрінің бұйрығымен белгіленген.

Қорғаныс министрлігінің басшылығы әскерлерді басқарудың тұтас жүйесін құрудың қажеттілігін Тәуелсіз Қазақстан әскері құрылған алғашқы күндерден бастап қолға алды.

Бұл ретте Қарулы күштер Бас штабының бас жедел басқармасы құрамында басқару пунктері бөлімінің құрылуы алғашқы қадам болды.

Қорғаныс ведомствосы басшысының 1998 жылғы 5 наурыздағы директивасымен Қорғаныс министрлігінің Орталық командалық пункті құрылды. 2017-2020 жылдарға арналған Ұлттық қауіпсіздік стратегиясын іске асыру мақсатымен 2019 жылғы 15 шілдеде Қорғаныс министрінің бұйрығымен Орталық командалық пункт Қарулы күштер Бас штабының құрылымдық бөлімшесі болып қайта құрылды. Ал 2021 жылы бұл бөлімше Ұлттық қорғанысты басқару орталығы болып өзгертілді.

Орталық командалық пункті құрудың бастауында генерал-майор Хайретдин Расқалиев тұрды. Әр жылдары бұл бөлімшеге генерал-майор Жомарт Қуанғалиев, полковниктер Марат Аманжолов, Вячеслав Лукашук, Қайрат Жұмаев басшылық жасады. Қазіргі уақытта Ұлттық қорғанысты басқару орталығын генерал-майор Фазылолла Бәденов басқарады.

Ұлттық қорғанысты басқару орталығы бейбіт және соғыс уақытында Қарулы күштерді орталықтандырылған жауынгерлік басқаруды қамтамасыз етуге арналған.

Бүгінде Қарулы күштерде әскерлерді жедел басқаруды жүзеге асыруға, Қорғаныс министрінің және Қорғаныс министрінің бірінші орынбасары – Қарулы күштер Бас штабы бастығының бұйрықтары мен өкімдерін стратегиялық деңгейден тактикалық деңгейге дейін уақтылы жеткізуге және олардың дәл әрі уақтылы орындалуын бақылауға мүмкіндік беретін командалық пунктер мен басқару пунктерінің заманауи жүйесі қалыптасқан.

Штабтардың әскерлер мен күштерді басқаруға тұрақты дайындығы жауынгерлік кезекшілік жүйесінің басқару пунктерінде ұйымдастыруға қол жеткізді.

Бейбіт уақытта командалық пунктер мен басқару пунктерінің мамандары жауынгерлік дайындықтың жай-күйін, жауынгерлік кезекшілік күштерінің дайындығын, елдің әуе шебінің қауіпсіздігін және армияның күнделікті тіршілік әрекеті іс-шараларының өткізілуін бақылауды жүзеге асырады.

Төтенше жағдайлар кезінде олар Қарулы күштер бөлімшелерінің Түркістан облысының Мақтаарал ауданындағы су тасқыны салдарын жоюды, Қостанай облысы мен Абай облысының «Семей орманы» аумағындағы өрт ошақтарын оқшаулау іс-қимылдарын үйлестірді. Биыл Ұлттық қорғанысты басқару орталығының офицерлері күштер мен құралдардың қозғалысын үйлестіруді, бақылауды, солтүстік және батыс өңірлердегі су тасқыны жағдайында жүргізілген жұмыстарды есепке алуды жүзеге асырды.

Әскерлерді тиімді пайдалану мақсатында командалық пунктер мен басқару пунктерінің мамандары мемлекеттің әскери қауіпсіздігін қамтамасыз ету мен халықты қорғау мүддесінде тәулік бойы кезекшілік жүргізіп келеді.

Ақпарат көзі: Министерство обороны Республики Казахстан