ҰЛТТЫҚ ҒЫЛЫМ АКАДЕМИЯСЫ МЕН ШЭНЬЧЖЭНЬ УНИВЕРСИТЕТІ БІРЛЕСКЕН ЗЕРТХАНА ҚҰРУ ТУРАЛЫ КЕЛІСІМГЕ ҚОЛ ҚОЙДЫ

  Бүгін Алматыда ҚР Президентінің жанындағы Ұлттық ғылым академиясы мен Шэньчжэнь университеті арасындағы бірлескен зертхана құру туралы келісімге қол қою рәсімі өтті. Іс-шара С.Асфендияров атындағы Қазақ ұлттық медицина университетінде өтті.

  Бұл келісімге қол қою Қытай Халық Республикасының Президенті Си Цзиньпин мырзаның Қазақстанға ресми сапары аясындағы негізгі оқиғалардың бірі болды. Келісім екі ел арасындағы ғылыми байланысты нығайтуға және бірлескен зерттеулер жүргізуге бағытталған.

  Салтанатты шараға академиялық қауымдастықтың жоғары лауазымды өкілдері, соның ішінде Шэньчжэнь университетінің Медицина факультетінің атқарушы деканы профессор Синчжи Сюй, ҚР Президенті жанындағы ҚР ҰҒА президентінің міндетін атқарушы Ляззат Ералиева, С.Асфендияров атындағы Қазақ ұлттық медицина университетінің басқарма төрағасы-ректоры Марат Шоранов, ҚХР-дың Алматыдағы Бас консулы Цзян Вэй, сондай-ақ «Өмір және денсаулық туралы ғылымдар» саласындағы жетекші қазақстандық ғалымдар қатысты.

  Алматы қаласындағы ҚХР-дың Бас консулы мырза Цзян Вэй құттықтау сөз сөйлеп, ҚХР мен Қазақстан арасындағы ынтымақтастықты атап өтті. Академия президентінің міндетін атқарушы Ляззат Ералиева Қазақстан Ұлттық ғылым академиясының қызметі туралы ақпарат беріп, жаңа құрылып жатқан зертхана бойынша Академияның көзқарасымен бөлісті. Сондай-ақ профессор Синчжи Сюй Шэньчжэнь университетінің ғылыми қызметінің нәтижелері мен жүзеге асырылып жатқан халықаралық жобалар туралы ақпарат берді.

  Қытайдың Шэньчжэнь университеті (SZU) 1983 жылы негізі қаланған және 2024 жылы USNews әлемдік рейтингінде 187-орынды иеленіп отыр. Университетте 250-ден астам халықаралық оқытушы жұмыс істейді. SZU Медицина мектебі биомедициналық инженерия және биология бойынша PhD мамандарын даярлайды.

  Бұл келісім аясында Шенжен-Алматы Медицина Ғылымдарының Алдыңғы Қатарлы Зертханасы құрылып, дамытылады. Бұл орталықтың бір филиалы Алматы қаласындағы ҚР Президентінің жанындағы ҚР Ұлттық ғылым академиясында, ал екінші филиалы Шэньчжэнь қаласындағы Шэньчжэнь университетінде орналасады.

  Ынтымақтастық бағыттары табиғи өнімдерден дәрілік препараттар әзірлеуді, геномның тұрақсыздығы мен ісік генезін зерттеуді, инфекциялық иммунитет пен қабынуды, сондай-ақ медициналық жабдықтарды әзірлеуді қамтиды. Ұсынылған алғашқы бірлескен зерттеу жобасы – «Фитошикізат негізінде жаңа дәрілік кандидаттардың көп мақсатты әзірлемесі».

  Бірлескен зертхананың құрылуы ғылыми-зерттеу жобаларын дамытудағы маңызды қадам болып, білім мен технологиялармен алмасуға жаңа мүмкіндіктер ашатын болады. Біз бұл ынтымақтастық Қазақстан мен Қытайға көптеген перспективалы бастамалар мен жобаларды жүзеге асыруға септігін тигізетініне сенімдіміз.

  Салтанатты рәсімнің жалғасында ҚР Президентінің жанындағы Ұлттық ғылым академиясы, Шэньчжэнь университеті және С.Асфендияров атындағы Қазақ ұлттық медицина университеті арасында үшжақты ынтымақтастық туралы меморандумға қол қойылды. Бұл маңызды оқиға Қазақстан мен Қытай арасындағы ғылыми және білім беру саласындағы ынтымақтастықтың жаңа кезеңін білдіреді. Меморандумға қол қою академиялық және медициналық мекемелер арасындағы байланысты нығайтуға, бірлескен ғылыми зерттеулер жүргізуге, білім мен тәжірибе алмасуға, сондай-ақ бірлескен білім беру бағдарламалары мен жобаларын іске асыруға мүмкіндік береді және бірлескен жобалар мен бастамаларды жүзеге асыруға жаңа мүмкіндіктер ашады.

видеоматериалға сілтеме

Ақпарат көзі: Қазақстан Республикасы Ғылым және жоғары білім министрлігі