Мемлекеттік қызмет істері агенттігінің төрағасы Дархан Жазықбай жұмыс сапарымен Алматы облысына барды. Сапар аясында облыстың мемлекеттік қызметшілері, Өңірлік кадр резервінің мүшелері және Жастар ресурстық орталығы өкілдерімен кездесулер өтті.

Кездесулерде Агенттік төрағасы Мемлекет басшысы биылғы жолдауында еліміздің дамуында шешуші рөл атқаратын бірқатар жүйелі мәселелерге ерекше көңіл бөлінгеніне, оның ішінде мемлекеттік басқару ісінің тиімділігіне қатысты ой пікірлерінің маңыздылығына арнайы тоқталды.

Облыстың мемлекеттік қызметшілерімен кездесу барысында МҚІА төрағасы жуырда Мемлекет басшысының Жарлығымен қабылданған,  Мемлекеттік қызметті дамытудың 2024-2029 жылдарға арналған тұжырымдамасының негізгі міндеттері жайлы айтты. «Бұл стратегиялық құжат Мемлекет басшысының мемлекеттік қызмет саласын ашық, әділ, адамға бағдарланған сипатта дамытуға қатысты алға қойған міндеттерін орындауға бағытталған және онда мемлекеттік аппаратты сервистік сипатта ілгерілету, мемлекеттік қызметшілерді кәсібилендіру және адам ресурстарын басқаруды цифрландыру мәселелеріне баса көңіл бөлінген», - деді Агенттік төрағасы.

Дархан Жазықбай Өңірлік кадр резервінің мүшелерімен кездесуде жастардың барлық жаңашылдық пен жасампаздықтың бастауы бола білуі керектігіне тоқталып, Мемлекет басшысының «Мемлекеттік қызмет дегеніміз – жеке бастың бақ-дәулетін арттыратын жер емес. Бұл – туған халқыңның алдында айрықша жауапкершілік арқалау» деген сөзін ескерудің маңыздылығын айтты.

Жастар ресурстық орталығында өткен еркін форматтағы пікір алмасу кезінде өңір жастары мемлекеттік қызметті дамытудың жаңа тұжырымдамасы аясында салаға қажетті жас таланттарды ынталандыруды көздейтін мектеп және университет деңгейіндегі ерте кәсіптік бағдарлау институтын құру бастамасына қызығушылық танытты.

Дархан Жазықбай ауыл-аймақтағы мемлекеттік басқару органдарының кадрлық әлеуетін жас мамандармен нығайту бағытындағы Агенттік бастамаларына тоқталып, мемлекеттік қызметке талантты әрі білімді жастардың қажет екенін ерекше атап өтті.

Жұмыс сапарының соңында МҚІА төрағасы Қонаев қаласындағы Халыққа қызмет көрсету орталығының жұмысымен танысып, жергілікті жердегі мемлекеттік қызмет көрсету сапасын арттыру, ақпараттың қолжетімділігін және қызметтер көрсетілетін орындардың қолайлығын қамтамасыз ету бағытындағы жұмыстарды күшейтуді тапсырды.

Ақпарат көзі: Агентство Республики Казахстан по делам государственной службы