Бүгін, 28 маусым - Бұқаралық ақпарат құралдары қызметкерлері күнінде облыс әкімі Нұрдәулет Қилыбай БАҚ өкілдерін кәсіби мерекемен құттықтап, арнайы наградалармен марапаттады, деп хабарлайды облыс әкімінің баспасөз қызметі.

Кездесуге қатысушыларға ҚР мемлекеттiк наградалары мен ҚР Мәдениет және ақпарат министрінің марапаттары табыс етілді. Көп жылдар өңірдің баспа басылымы саласында еңбек еткен, журналистика саласының ардагері Ғалым Әріп «Құрмет» орденімен және облыстық телеарнаның шеф редакторы Маржан Медиева «Ерен еңбегі үшін» медалімен марапатталды.

Сондай-ақ, өңірдің баспа басылымдарында көп жылдар еңбек еткен ардагер журналист Жоламан Айдарбаев «Еңбек ардагері» төсбелгісіне және Қазақстан журналистер одағының мүшесі, журналист Рахат Қосбармақ, облыстық телеарнаның шеф редакторы Жанаргүл Масугутова, «Mangystaumedia.kz» ақпараттық агенттігінің тілшісі Ольга Золотых, Қазақстан журналистер одағының мүшесі Кәмшәт Ізбасарова «Ақпарат саласының үздігі» төсбелгісіне ие болды.

Сонымен қатар, өңірдің бұқаралық ақпарат құралдары саласының дамуына қосқан үлесі үшін бірқатар журналистерге Қазақстан Республикасы Мәдениет және ақпарат министрінің «Құрмет грамотасы» және облыс әкімінің Алғыс хаты табыс етілді.

Жиында аймақ басшысы ақпарат кеңістігінде жемісті еңбек етіп жүрген барша журналистерді кәсіби мерекелерімен құттықтап, олардың өңір тұрғындарының өміріне қажетті барлық саладағы мәселелерді жан-жақты зерттеп, халық назарына ұсынудағы қажырлы еңбектеріне алғыс білдірді.

- Жақсы жаңалықтың жаршылары, күн-түн демей шапқылап жүретін ақпарат саласының майталмандары бүгінгі мерекелеріңіз құтты болсын. Өткен ғасырдан бері Қазақ журналистикасының көшін алға сүйреп жүрген БАҚ қызметкерлерінің еңбегін ерекше атап өтуге болады. Кеше ғана Президентіміз үлкен жиын өткізіп, әртүрлі бағыттағы ел ішіндегі өзекті мәселелер қозғалды. Сіз бен біздің қазіргі міндетіміз - сол берілген тапсырмаларды мәресіне жеткізу, халықтың әл-ауқатын күшейту. Оңай жұмыс емес, демалысқа қарамай халыққа жаңалық таратуға үлес қосып жүрген барша БАҚ қызметкерлеріне алғыс білдіремін. Еңбектеріңіз жемісті болсын, - деді Нұрдәулет Қилыбай.

Ақпарат көзі: ГУ "Аппарат акима Мангистауской области"