Облыс әкімінің халықпен кездесуі жалғасуда. Бүгін Марат Ахметжанов Аршалы ауданының тұрғындарымен кездесті. Елорданың жанында орналасқан ауданның даму әлеуеті жоғары.

Облыс әкімінің айтуынша, ауыл шаруашылығы саласына көп көңіл бөлінуде. 2024 жылы бір ғана Аршалы ауданында агроөнеркәсіп кешенін мемлекеттік қолдау 6,4 млрд теңгені құраса, оның 2,8 млрд теңгесі қайтарымсыз. Форвардтық сатып алу бағдарламасы бойынша 354,4 млн теңгеге 4 өтінім түсті. Ал «Кең дала» бағдарламасы арқылы 1,4 млрд теңгеге 34 өтінім қабылданды.

Аудан өнеркәсіптік және ауылшаруашылық өндірісімен танымал. Өндірістік әлеуеттің қалыптасуына әсер ететін негізгі кәсіпорындар «ҚазШпал» АҚ, «SG BRICK» және «Аркада-Индустри» ЖШС болып табылады. Аймақтың жалпы өнеркәсіп өніміндегі үлесі төмен – небәрі 5,5% құрап отыр.

Жалпыұлттық пул аясында 11,4 млрд теңгеге 3 жоба іске асырылуда. Нәтижесінде, 151 жұмыс орны ашылмақ. Бұл құрғақ құрылыс қоспаларын шығаратын «TENUS» ЖШС зауатын кеңейту және «SG Brick» ЖШС кірпіш зауытының екінші кезенің құрылысы, сондай-ақ, «US Limited» ЖШС жанындағы «Разгуляй» демалыс орнын қайта жаңғырту көзделіп отыр.

«Облыста республикалық маңызы бар «Aqmola» индустриалды аймағы құрылды. Бұл – өңірді жедел дамуына өздік септік тигізбек. Өйткені, индустриялық аймақ аумағында жаңа өндіріс орындарының ашылуы, қосымша жұмыс орындарының пайда болуымен қатар, аудан бюджетінің кіріс көздеріне де оң әсерін тигізеді», - деп атап өтті облыс әкімі.

Өңір экономикалық тұрғыдан тиімді орналасуының арқасында елорданы құрылыс материалдарымен қамтамасыз етуде маңызды рөл атқарады. Алайда, қиыршық тас карьерлерінің негізгі бөлігі Аршалы ауданында орналасқандықтан, жазғы уақытта жүк көліктердің өтуіне байланысты бұл аймақта шаң-тозаң мәселесі туындайды.

«Экологиялық қауіпсіздік талаптарын сақтамаған жер қойнауын пайдаланушыларға заңнамаға сәйкес шаралар қабылданады. Атап айтқанда, экологиялық рұқсаттарды қайтарып алу және кейіннен келісім-шарттарды бұзу. Осы тұрғыда Аршалы ауданына табиғатты қорғау инспекторы келді. Сондай-ақ ауданның кірісіне салықты ұстап қалу үшін жергілікті жер қойнауын пайдаланушыларды Аршалы ауданы бойынша мемлекеттік кірістер басқармасына қайта тіркеу шараларын қабылдау қажет», - деді спикер.

Марат Ахметжанов аудан әкімдігіне бірқатар тапсырма жүктеді. Халықты қолданыстағы  қолдау шаралары туралы кеңінен хабардар ету қажеттігін айтты. Сонымен қатар қажет болған жағдайда бизнес  бастамаларды сүйемелдеу, егістік алқаптарды әртараптандыруды тапсырды.  Сүт зауыттарының жүктемелігін  83, ет комбинаттарыныкін 38%-ке  және май зауыттарының жүктемесін 34 процентке дейін жеткізуді қамтамасыз ету керектігін айтты.

«Субсидиялар жай ғана мемлекеттік көмек емес, ең алдымен еңбек өнімділігін арттыру және нақты нәтижеге жету үшін бизнесті ынталандыру екенін есте ұстаған жөн. Бірлескен іс-қимылдың арқасында біз халықтың әл-ауқатын арттыру бойынша алға қойған мақсаттарға қол жеткізе алатынымызға сенімдімін», - деп түйіндеді сөзін Марат Ахметжанов.

Сондай-ақ өңір басшысы көктемгі су тасқыны кезіндегі жасалған іс-әрекеттері үшін халыққа және барлық қатысқан қызметтерге алғыс айтты. Азаматтарды жеке қабылдау аясында ауданның инфрақұрылымын дамыту және әлеуметтік нысандар құрылысына қатысты көкейтесті сұрақтарымен 10-ға жуық адам жүгінді.

Ақпарат көзі: ГУ «Аппарат акима Акмолинской области»