Аймақ басшысы Бурабай өңірінде мультимедиалық интерактивті кешеннің ашылу салтанатына қатысты.

Мультимедиялық интерактивті кешен жай ғана мұражай емес, сондай-ақ заманауи технологиялармен мультимедиалық кеңістікті біріктіретін нысан.  Мұнда жаңашылдық пен дәстүр ерекше үйлесім тапқандықтан, әрбір келуші өзіне қажеттіні табады.

Марат Ахметжанов құттықтау сөзінде мультимедиалық орталық тек демалыс пен ойын-сауық орнына ғана емес, тарихи-мәдени мұраның орталығына айналатынын атап өтті.

«Мемлекет басшысы жуырда сөйлеген сөзінде Щучье-Бурабай курорттық аймағын еліміздегі туризмді дамытатын үш орталықтың бірі ретінде белгіледі. Бұл туризм инфрақұрылымын дамытудың, жаңа жұмыс орындарын ашудың және өңірге инвестиция тартудың алғышарты болмақ. Бүгінгі шара соның бір айғағы. Кешеннің Абылай хан алқабы аумағында орналасуының символдық мәні зор - себебі бұл аумақ біздің еліміздегі киелі орындар тізіміне енгізілген және Бурабай шипажайының басты көрікті жері. Келер жылы облыста Ұлттық құрылтай өткізу жоспарланып отыр, бұл орталық сол шараға жақсы бастама болмақ», - деді облыс әкімі.

Шараға Қазақстан Республикасының мәдениет және ақпарат  министрі Аида Балаева, ҚР Президенті Іс  басқарушысының орынбасары Рустам Баялиев, «Kaspi Bank» АҚ-ның басқарушы директоры Сабыржан Беркінбаев қатысты.

Айта кетсек, күніне 500 демалушыны қабылдауға қауқарлы кешен, бүгінде Қазақстандағы ең жоғары технологиялық интерактивті мұражайлардың біріне айналды. Жаңа анимациялық және аудиовизуалды технологиялардың арқасында әрбір келуші еліміздің тарихымен тереңірек танысып, қазақ мәдениетінің тұңғиығына бойлай алады. Аталмыш кешендегі өзге де интерактивті элементтер әр көрерменге  қызықты және есте қаларлық  әсер қалдырары сөзсіз.

Ақпарат көзі: ГУ «Аппарат акима Акмолинской области»