Бүгін, 9 қыркүйек күні облыс әкімі Нұрдәулет Қилыбайдың төрағалығымен өткен аппараттық жиында «Жайлы мектеп» ұлттық жобасының орындалу барысы талқыланды.

Жиынға құрылыс жұмыстарын жүргізуге конкурсты жеңіп алған мердігер мекемелердің басшылары да қатысты.

Маңғыстауда жоба аясында 2023-2025 жылдарға арналған 22 000 орындық 21 жаңа мектептің құрылысы жоспарланған. Биыл өңірде 12 600 оқушыға арналған 13 мектептің құрылысы жүргізілуде.

Аппараттық кеңесте облыстық құрылыс, сәулет және қала құрылысы басқармасының басшысы Айдос Хамиев мектептің құрылыс-монтаждау жұмыстары мен сыртқы инженерлік коммуникациялық инфрақұрылымның жай-күйі туралы баяндады.

- Биыл қазан айына дейін 2 400 орындық 2 мектеп, желтоқсанға дейін 10 200 орындық 10 мектеп, ал 2025 жылға 1 500 орындық 1 мектеп өтпелі кезеңмен іске қосылады деп жоспарлануда. Қазіргі таңда Ақтау, Жаңаөзен қалаларында және Мұнайлы, Бейнеу, Маңғыстау аудандарында құрылыс нысандары жүргізіліп жатыр. Жобалар бойынша сыртқы инженерлік желілер, жаяу жүргіншілер жолдары мен автокөлік жолдарына қатысты жұмыстар орындалуда және кейбір жобалар бойынша сараптама қорытындысы күтілуде, - деді Айдос Хамиев.

Ал, облыс әкімі Нұрдәулет Қилыбай мемлекет тарапынан мектеп құрылысына қажетті барлық жағдайдың жасалғанын алға тартып, мердігер мекеме басшыларына құрылыс мерзімдерінің сақталуын тапсырды.

- Жауапкершілікті алдыңыздар ма уақытында тарсырыңыздар. Қажет болса жұмыс күшін қосыңыздар. Кейбір аудандарда балалар қазіргі оқып жатқан мектептен тым алыс тұрады. Халық бұл мектептерді күтіп отыр. Біздің алдымызда тұрған ең басты міндет – мектептердің сапалы және уақытылы аяқталуы. Мердігерлерден жауапкершілікті күшейтіп, жұмыстың кестеден қалмауын талап етемін, - деді Нұрдәулет Қилыбай.

Айта кетейік, 2025 жылы тағы 9 400 орындық 8 мектепті пайдалануға беру жоспарлануда.

Маңғыстау облысы әкімінің баспасөз қызметі.

Ақпарат көзі: ГУ "Аппарат акима Мангистауской области"