Сарыөзек гарнизонындағы 12740 әскери бөлімінің полигонында «Оңтүстік» өңірлік қолбасшылығының бригада, батальон және рота командирлерінің қатысуымен нұсқаулық-әдістемелік сабақтар өтті.

Далалық жағдайдағы оқулар бірікпе қолбасшысы генерал-майор Қуанышбек Үштаевтың басшылығымен өтті. Ол нұсқаулық-әдістемелік сабақтардың ұйымдастырылуына жоғары баға берді.

Полигонда шабуылдау бригадасының жеке құрамы батальондық тактикалық топтарды жауынгерлік жағдайда орналастыру үшін арнайы оқыту пункттерін дайындады. Оқу-әдістемелік сабақтар сегіз нүктеде өтті. Онда жеке құрамның жауынгерлік техникасы мен жатын бөлмесін, асхананы, далалық медициналық пункті, тыл шаруашылығын, байланыс пунктін және атыс позициясын бүркемелеу үлгілері ұсынылды. Оқу нүктелерінің басшылары әскери қызметшілерге жасырын бүркемелеудің қазіргі заманғы соғыстағы маңыздылығын түсіндірді.

Тәжірибелі нұсқаушылар жауынгерлік позициялар мен техниканы бүркемелеу, сондай-ақ көрші бөлімшелермен өзара іс-қимылды ұйымдастыру мысалдарын көрсетті. Командирлерге бөлімшелерді авиациялық камералардан жасыру тәсілдері және ұшқышсыз ұшу аппараттары шабуыл жасаған жағдайда жеке құрамды қорғау тәсілдері көрсетілді. 

– Сабақтарда командирлер өз білімдерін жаңартып, тәжірибе алмасып, осы бағыттағы жұмыстармен танысты, – деп нақтылады 12740 әскери бөлімінің штаб бастығы подполковник Айбар Абайұлы. – Түсінікті болу үшін оқу нүктелері ұйымдастырылды. Онда далалық жағдайдағы батальондық тактикалық топтарды орналастыру тәсілдері ұсынылды.

Бұл нұсқаулық-әдістемелік сабақтар «Айбалта-2024» жаттығуларына дайындық кезеңдерінің бірі болғанын айта кету керек.

Ақпарат көзі: Министерство обороны Республики Казахстан