Негізі, Қобда ауданында 147 үй салынуы тиіс. Бүгінде құрылысшылар аудан орталығында 54, Жарық ауылында 9 үйдің құрылысын толық аяқтап, халық игілігіне беруге дайындап қойды. Сондай-ақ, 118 отбасы үйлерінде жөндеу жұмыстарын бітірді. Тағы баспанасыз қалған 8 отбасыға дайын үй сатып алынды.

Құрылыс жұмыстарының барысын облыс әкімінің орынбасары Асылбек Есенбаев бағамдады. Ол мердігер компаниялардың өкілдеріне жұмыстарды сапалы әрі мерзімінде аяқтау керектегін еске салды.

Айтып өтейік, Ақтөбе өңірінде Мемлекет басшысының тапсырмасы аясында су тасқынынан зардап шеккендерге көмек көрсету бойынша кешенді жұмыстар жүргізілуде.

Су тасқынына қарсы іс-шаралар аясында «Орал – Ойыл», «Батыс» және «Сауқайың» сияқты қорғаныс бөгеттері салынады. Үш жобаға 991 миллион теңге бөлінді..

Жолдардың жағдайына келетін болсақ, ауданда 1,8 млрд. теңгеден астам қаражат бөлінген 9 жоба жүзеге асырылуда. Мәселен, «Ақтөбе-КапиталСтрой» ЖШС компаниясы «Қобда – Сарыбұлақ» автожолы мен Өтек ауылына кіреберіс жолды күрделі жөндеуден, Көк үй және Қанай, Байтақ ауылдарының ұзындығы 23,3 шақырымды құрайтын кіреберіс жолдарын орташа жөндеуден өткізеді.

«АКС СтройИнвест» ЖШС Жарық ауылына кіреберіс жолды жөндейді. Ал «ҚұрылысГрупп» ЖШС - Бұлақ ауылына және «Бестау-Жарсай» бағытындағы жолды ретке келтіреді. «Бабәк Құрылыс» ЖШС Қобда ауылында атаусыз көшеге жол салады.

Сондай-ақ, Қобда ауылындағы И.Тайманов ат. гимназияда жөндеу жұмыстары аяқталды. Мердігер қабырғаларды әктеп, электр панеліндегі жабдықты ауыстырып, жертөлені гидрооқшаулады. Гимназияның 345 оқушысының білім алуына қолайлы жағдай жасалды.

Ауданда су тасқыны салдарын жою мақсатында тиісті іс-шаралар жүргізіліп, тұрғындар үшін қауіпсіз және жайлы өмір сүруге бағытталған жұмыстар атқарылуда.

Ақпарат көзі: ГУ «Акимат Актюбинской области»