Бүгін Ақмола облысының әкімі Марат Ахметжановтың қатысуымен облыс орталығында Қазақстан полициясы күніне арналған салтанатты іс-шара болып өтті.

Полиция департаментінің автопаркі Hyundai Elantra және Hyundai Sonata маркалы автомобильдерімен толықтырылды.

Бұдан әрі салтанатты шара «Көкшетау» мәдениет үйінде жалғасып, онда өңір басшысы құқық қорғау қызметінің ардагерлері мен қызметкерлерін кәсіби мерекелерімен құттықтап, жылы лебізін білдірді.

«Құқық қорғау органдары құқықтық режим мен заңдылықты қамтамасыз ету, азаматтардың конституциялық құқықтарын қорғау жөніндегі күрделі және жауапты міндеттерді лайықты орындап келеді. Ішкі істер органдарының әрбір қызметкері әділдіктің, ашықтықтың және адалдықтың үлгісі болуы тиіс. Сіздердің кәсіби шеберліктеріңіздің арқасында қоғамда тұрақтылық қалыптасып, азаматтардың құқық қорғау органдарына деген сенімі артуда. Алдағы уақытта да, полиция қызметінің негізгі міндеттері Сіздердің адал еңбектеріңізбен, үйлесімді жұмыстарыңыздың нәтижесінде өз абырой биігінен көріне береді  деген сенімдемін», – деді М.Ахметжанов.

Атап өтуіміз керек, Ақмола облысында полиция органдарын материалдық-техникамен қамтамасыз етуге ерекше көңіл бөлінеді. Соңғы 3 жылда полиция департаментіне 4 миллиард теңге бөлінді. Автокөлік құралдарын лизингке алу тәжірибесі де жалғасын табуда, биыл 50-ге жуық техника сатып алынады. Заманауи бейнебақылау камералары, принтерлер, планшеттер, қызметке қажетті барлық компьютерлік жабдықтармен толық қамтамасыз етілуде. Қосымша халықты құжаттандыру терминалы мен биометриялық терминалға қаражат бөлініп отыр. Полиция органдары ғимараттарының техникалық жағдайына ерекше назар аударылатынын да атап өтуіміз керек.

Іс-шара барысында антына адал, сертіне берік, мінсіз қызметімен ерекшеленген полиция қызметкерлері «С.Қ. Нұрмағамбетовке 100 жыл» медальдарымен және облыс әкімінің Алғыс хаттарымен марапатталды. Сонымен қатар, «JAC JS-4» маркалы қызметтік автомобильдердің 5 сертификаты табыс етілді.

Ақпарат көзі: ГУ «Аппарат акима Акмолинской области»