Ауданның құрылғанына бір жылдан енді ғана асса да оң өзгерістер байқалады. Аудан тұрғындарына қолайлы жағдай жасауға бағытталған инфрақұрылым нысандарының құрылысы мен абаттандыру жұмыстары жүргізілуде.

«Бүгінде Мақаншы – облысымыздың «шығыс қақпасы», болашағы зор аудан. Көптеген ірі жобалар соған тікелей байланысты. Біз туризм, логистика, шекаралық қатынастар және саудаға баса назар аударамыз. Біздің басты міндетіміз – өңір экономикасын нығайту және халықтың өмір сүру сапасын арттыру. Иә, шешімін таппаған мәселелер бар, бірақ жұмыс жүйелі түрде және менің жеке бақылауымда жүріп жатыр», – деді аймақ басшысы.

Тұрғын үй-коммуналдық және көлік инфрақұрылымын дамытуға баса көңіл бөлінуде. Облыстағы сумен желілерінің ұзындығы 3220 шақырымнан асады. Ал 2026 жылға дейін облыстың барлық тұрғындарын ауыз сумен қамтамасыз ету үшін 46 жобаны жүзеге асыру жоспарланса, оның алтауы биыл басталған. Мақаншы ауданында қазірдің өзінде 22 540 адам тұратын 16 ауыл таза ауыз сумен қамтылып, Қабанбай, Бекет елді мекендеріндегі жұмыс жалғасуда.

Сондай-ақ аудандағы Мақаншы, Қарабұлақ, Қызылбұлақ сынды сегіз ауылға көше жарығын орнату жоспарда бар. Жыл басынан бері облыста 190 мың шаршы метрге жуық тұрғын үй пайдалануға берілді. Оның ішінде 1350 шаршы метрі Мақаншы ауданына тиесілі. Ауданның әлеуметтік жағынан осал азаматтары үшін 50 жалға берілетін пәтер сатып алу жоспарлануда.

«Облыстың туристік әлеуеті кеңінен мәлім, оның басты байлығының бірі – аймақтың өзіндік «төлқұжатына» айналған Алакөл көлі. Алдағы уақытта жағалаудың санитарлық жағдайын жақсартып, оны абаттандыру жұмыстарын күшейту жоспарлануда. Аудан әкімдігі бұл бағытта нәтижелі жұмыс ұйымдастыруы қажет. Көл жағасында апаттық-құтқару стансасының құрылысына жобалық-сметалық құжаттаманы әзірлеуге 7,1 млн теңге бөлінді», – деді аймақ басшысы.

«Ауылдық денсаулық сақтау саласын жаңғырту» ұлттық жобасы аясында облыста сегіз алғашқы медициналық-санитарлық көмек нысанының, оның ішінде күндізгі стационары бар дәрігерлік амбулатория мен зертхананың құрылысы басталды.

Облыс әкімі есеп беру соңында азаматтарды жеке қабылдады. Тұрғындар тарапынан қойылған сауалдарға әкім жан-жақты жауап қайтарып, аудан әкімі мен құзырлы бөлімдерге тиісті тапсырмалар берді.

Ақпарат көзі: Абай облысының әкімдігі