Жамбыл облысының әкімі Ербол Қарашөкеев Қазақстан Республикасының Конституциясы күніне арналған салтанатты жиынға қатысты.

Алдымен Ы. Дүкенұлы атындағы қалалық мәдениет үйіне жиналған көпшілік Әнұранды әуелете шырқап, айтулы күннің ажарын айшықтай түсті.

Бұдан соң облыс әкімі жамбылдықтарды мерекемен құттықтады.

- Баршаңызды 30 тамыз – Қазақстан Республикасының Конституциясы күнімен шын жүректен құттықтаймын!

Ата заң – тәуелсіздігіміздің берік тірегі, мемлекетіміздің экономикалық даму жолындағы бағыт-бағдарын айқындайтын басты құжат.

Қазіргі жаһандану заманында Конституция егемендіктің, тұрақтылықтың нағыз символына айналды.

Еліміздегі әрбір адам Ата заңды құрметтеп, Мемлекет басшысының «Адал азамат» қағидасына сай еліне адал қызмет атқаруы керек деп есептеймін.

Заңды білу – заман талабы болса, Конституцияны қастерлеу, оған бағыну арқылы біз өз елімізді, Отанымызды, тарихи құндылықтарымызды құрметтейміз және қоғамдық келісімге, бейбітшілік пен тыныштыққа қол жеткізе аламыз, – деген Ербол Қарашөкеев облыстың даму көрсеткіштері мен жетістіктеріне тоқталды.

Салтанатты жиында өңір басшысы бірқатар азаматқа мерекелік марапат табыстап, құрмет көрсетті. Атап айтқанда, «Тараз құрылыс дизайн» ЖШС-ы директорының кеңесшісі Тимур Манашов «Құрмет» орденімен, еңбек ардагері Данияр Ынтықбаев «Ерең еңбегі үшін» медалімен наградталды. Бұдан бөлек, өңірдің әлеуметтік-экономикалық дамуына үлес қосқан әр саланың мамандары «Облысқа сіңірген еңбегі үшін» белгісімен, облыс әкімінің Құрмет грамотасы және Алғыс хатымен марапатталды.

Шара соңы облыс өнерпаздарының концерттік бағдарламасына ұласып, Халық әртісі Ескендір Хасанғалиевтің «Атамекен» әнімен қорытындыланды.

Ақпарат көзі: КГУ «Аппарат акима Жамбылской области»