Ұлытау облысының әкімі Берік Әбдіғалиұлы Сәтбаев тұрғындарымен кездесу барысында қолға алынатын күрделі жобаларға тоқталып, аймақ басшысы Мұрат Бөрібаевтың есебін тыңдады.   «Қазір облыста газдандыру мәселесі сәтті жүзеге асып жатыр. Көгілдір отынмен жұмыс істейтін қазандық қою тәжірибесін Жезқазғаннан бастадық. Сәтбаевта да орнату үшін қазір жоба дайындалуда.  

Сондай-ақ құрылысы мәселеге айналған нысандар осы жылдың соңында қолдануға беріледі. Ол – оқушылар сарайы, 320 орындық балабақша. Сонымен қатар, мүлде жөндеу көрмеген қос бөбекжай күрделі түрде жаңартылып жатыр. Нәтижесінде, қалада орын тапшылығы мәселесі шешімін табады»,-деді өңір басшысы өз сөзінде.   Қазіргі таңда қаладағы маңызды жұмыстың бірі – жылыту маусымына дайындық. Ол үшін төрт қазандықтың екеуінде күрделі, екеуінде ағымдағы жөндеу жүргізілуде.   Қаладағы қоқыс жәшіктерінің жетіспеушілігі мәселесі кезең-кезеңімен шешімін табуда. Ол үшін жерасты контейнерлер орнатылып жатыр, 7-шағын ауданның өзінде оның 22-сі орнатылмақ. Айта кетерлігі, биыл «Таза Қазақстан» экологиялық акциясының арқасында қалада 200 тонна қоқыс пен қатты қалдық шығарылған.   Аймақтағы жалғыз үлкен мәдени ошақ – Ш.Ділдебаев атындағы Кеншілер сарайын күрделі жөндеуден өткізу үшін жобаның эскизі дайындалды.   Сәтбаев қаласының аумағында өсімдік шаруашылығын дамыту үшін конкурс жұмысы аяқталып, қожалық иесі анықталды. Нәтижесінде, 2010 гектар аумақта картоп, жоңышқа, жемшөп өнімдерін алу үшін игеру көзделіп отыр.   Жиыннан кейін Ұлытау облысының әкімі, әкім орынбасарлары мен басқарма басшылары азаматтарды жеке сұрақтары бойынша қабылдады.

Ақпарат көзі: Ұлытау облысының әкімдігі