Жаңаарқа ауданында балаларға арналған жазғы лагерь ашу жобасын жүзеге асыратын кәсіпкерлер табылса, әкімдік әр демалушы бала басына әлеуметтік тапсырыс аясында қаржылай қолдау білдіруге дайын. Сондай-ақ ауданға әр бағыт бойынша тапшы, сырттан келуге ниет білдірген 7 дәрігердің әрқайсысына 8 миллион теңге көтерме үстемақы беру арқылы жағдай жасап, ары қарай тұрақты жұмыспен қамтуға толық мүмкіндік бар. Ұлытау облысының әкімі Берік Әбдіғалиұлы жаңаарқалықтармен кездесуінде келуші мамандарға арналған баспаналар санын арттыру қажеттігін аудан әкіміне тапсырды.

Одан бөлек, өңір басшысымен болған кездесуде Жаңаарқа ауданының әкімі Қанат Қожықаев баяндама жасап, аймақта атқарылып жатқан жұмыстарды баян етті. Жиналғандар облыс әкімі мен облыс әкімдігінің басқарма басшыларына теміржол стансасына арнайы белгі қою, кенттің қала мәртебесін алуы, Қызылжар кентінде жаңа мектеп салу, тоқтың тарифі, балабақшаға орналасу, дәрігер тапшылығына қатысты мәселелерін жеткізді.

Жиыннан кейін Ұлытау облысының әкімі Берік Әбдіғалиұлы аудан тұрғындарын жеке қабылдады. Өңір басшысының қабылдауында 13 адам болып, мәселелерін жеткізді.

Ақпарат көзі: Ұлытау облысының әкімдігі