«Орта білім беруді жаңғырту» жобасы аясында қорытынды семинар өтті

  2024 жылғы 22 қазанда «Орта білім беруді жаңғырту» жобасын іске асыру қорытындылары бойынша семинар өткізілді. Жобаны Қазақстан Республикасы Білім және ғылым министрлігінің құқықтық мирасқорларының бірі ретінде Қазақстан Республикасы Ғылым және жоғары білім министрлігі 2023 жылдан бастап іске асырып келеді.

  Семинарға Ғылым және жоғары білім министрі С. Нұрбек бастаған Ғылым және жоғары білім министрлігінің өкілдері, ведомстволық бағынысты ұйымдардың және еліміздің педагогикалық бағыттағы бағдарламаларды іске асыратын жоғары оқу орындарының өкілдері қатысты. Бұдан басқа семинарға Дүниежүзілік банк, Ы. Алтынсарин атындағы Ұлттық білім академиясы, «Өрлеу» Ұлттық біліктілікті арттыру орталығы сияқты мүдделі тараптар да қатысты.

  Жобаны іске асыру шеңберінде жоғары оқу орындарының 2500 профессорлары мен окытушылары және ауыл мектептерінің 200-ден астам мұғалімдері мен директорлары жаңа білім беру бағдарламалары саласында, инклюзивті білім берудің жаңа моделі бойынша, халықаралық тәжірибедегі қазіргі заманғы ерекше білім беру қажеттіліктері бар балаларды диагностикалау және қолдау әдістемелері бойынша өз біліктіліктерін арттырды. Сонымен қатар, ҰБТ-ның бағалау жүйесін жақсартуға ерекше назар аударылды. Осы іс-шара аясында 350 ҰБТ тест тапсырмаларын әзірлеуші халықаралық тәжірибеге сәйкес оқытудан өтті, ҰТО мамандары Ұлыбританияның халықаралық озық тәжірибесіне негізделген ҰБТ тест тапсырмаларының мазмұны және бағалау рәсімдері бойынша оқытудан өтті. Материалдық-техникалық базаны жаңғырту бөлігінде педагогикалық бағыттағы бағдарламаларды іске асыратын ЖОО-лар заманауи пәндік кабинеттермен, робототехника зертханаларымен және инклюзивті білім беру кабинеттерімен жарақтандырылды. Жобаның арқасында ҰТО өңірлік тестілеу орталықтары құрылып, жарақтандырылды, осылайша өңірлерде тестілеуді өткізуге үлкен қолдау көрсетілді.

  Семинар барысында тәуелсіз тарап жүргізген Жоба нәтижелеріне мониторинг және бағалау бойынша қорытындылар шығарылды. Бағалау нәтижелері бойынша Жобаның барлық индикаторларына қол жеткізуі атап өтілді, оқытылған мамандар курстардың пайдалылығын және олардың өз қызметінде тәжірибе барысында қолданылуын жоғары бағалады.

  Семинарға қатысушылар Жобаның қол жеткізген нәтижелерін және олардың ұзақ мерзімді әсерін, сондай-ақ елдің білім беру жүйесін одан әрі дамыту үшін Жоба нәтижелерінің тұрақтылығын қамтамасыз ету шараларын белсенді талқылады.

Ақпарат көзі: Қазақстан Республикасы Ғылым және жоғары білім министрлігі