Қостанай облысының әкімі Құмар Ақсақалов «Милх» ЖШС-де болып, ірімшік өндіретін жаңа зауыт құрылысының барысымен танысты.

Жобаға шамамен 7,2 млрд теңге инвестицияланды, кәсіпорында 35 жаңа жұмыс орны ашылады.

Зауыт ірімшіктердің кең ассортиментін шығарады. Қайта өңдеу қуаты жылына 2 мың тонна өнімді құрайды. Нысанды пайдалануға беру 2024 жылдың қараша айына жоспарланған.

Бүгінгі күні жобалау-сметалық құжаттама әзірленді, цехтың металл қаңқасы орнатылды, цехтың қаңқасын сэндвич-панельдермен қаптау бойынша негізгі құрылыс-монтаж жұмыстары, шатыр жұмыстары, ғимараттың еденін төсеу аяқталды. Ішкі құрылыс жұмыстары жүргізілуде. Германиядан технологиялық жабдықтардың көп бөлігі сатып алынды. Ірімшіктің 20-ға жуық түрін шығару жоспарлануда.

«Мемлекет басшысының тапсырмасы бойынша біздің алдымызда үш жыл ішінде агроөнеркәсіптік кешендегі қайта өңделген өнімнің үлесін 70% –ға дейін арттыру міндеті тұр», - деп атап өтті Құмар Ақсақалов. – «Басымдықта ет, сүт және астықты терең өңдеу сияқты перспективалы бағыттар бар. Бұл салада біз өңірді дамыту үшін үлкен маңызы бар бірқатар инвестициялық жобаларды іске асырып жатырмыз. Агроөнеркәсіптік кешенге инвесторларды тарту жұмыстары жалғасуда. Облыс әкімдігі тарапынан инвесторларға жан-жақты қолдау көрсетілетін болады».

«Милх» ЖШС жаңа зауытын іске қосу осы міндетті іске асырудағы тағы бір қадам болмақ. Кәсіпорын жоғары сапалы өнім өндіріп қана қоймай, жаңа жұмыс орындарын ашады, сондай-ақ өңір экономикасының дамуына ықпал етеді.

Ақпарат көзі: ГУ «Аппарат акима Костанайской области»