ҚР Адам құқықтары жөніндегі уәкіл Артур Ластаев тұрақты негізде азаматтарды жеке қабылдау жүргізеді.Соңғы қабылдау барысында төрт азамат сот актілерімен келіспеу және кассациялық шағымдануға жәрдемдесу туралы мәселелермен жүгінді. Келушілерге өздерін қорғау кезінде қолдануға болатын құқықтық әдіс-тәсілдер мен құралдар түсіндірілді.Сонымен қатар олардың назарына сот төрелігіне қол жеткізуді кеңейту мақсатында Парламент қазіргі уақытта сот жүйесін реформалау және процестік заңнаманы жетілдіру мәселелері бойынша заң жобасын қарастырып жатқаны жеткізілді.Ағымдағы жылдың басынан бері Адам құқықтары жөніндегі уәкіл және оның кеңсесі жеке қабылдау барысында 73 азаматты, ал өңірлердегі өкілдер 1267 азаматты қабылдады. Ал 2023 жылы жеке қабылдауға 2405 азамат жазылған болатын.Ағымдағы жылғы статистика азаматтардың көбі, өткен жылдағыдай, соттардың қабылдаған шешімдерімен және сотқа дейінгі тергеп-тексеру органдарының әрекеттерімен келіспейтінін көрсетті.Сондай-ақ адамдарды азаптау, қамауда ұстау шарттарын бұзу фактілері туралы өтініштер келіп түсуде.Жалпы алғанда, Адам құқықтары жөніндегі уәкіл мемлекеттік органдардың қызметін алмастырмайды, бұзылған құқықтарды қалпына келтіру үшін мемлекеттік органдарға тексерулер мен ұсынымдар жүргізу туралы сұрау салу арқылы жәрдем көрсетеді.Мәселен, 4 ай ішінде 2158 өтініш берушінің 1059-ына қолданыстағы заңнаманың талаптары түсіндірілді, 348 өтініш құзыретті органдарға жіберілсе, 377 (яғни өтініштердің жалпы санының 17,4%-ы) арыз берушінің талаптары мен өтініштері қанағаттандырылды.

Ақпарат көзі: Қазақстан Республикасындағы Адам құқықтары жөніндегі уәкіл