Португалия Аудиторлар сотының судьясы Мария Да Луш Кармезим Фария бастаған Литва, Португалия және Түркияның жоғары аудит органдарының мамандары «жағдайы бойынша тең» форматында ҚР Жоғары аудиторлық палатасы қызметін тексеру үшін Астанаға 5 күндік жұмыс сапарымен келді.

Бұл – жағдайы бойынша тең институттар жүргізетін халықаралық аудит стандарттарына сәйкестігін тәуелсіз бағалау. Іс-шара тәжірибе алмасуға және қабылдаушы елдегі мемлекеттік аудит деңгейін арттыруға арналған.

Жұмыс сапары аясында әріптес елдердің жоғары аудит органдарының өкілдері ҚР Жоғары аудиторлық палатасының жұмыс әдіснамасымен, мемлекеттік аудиттің IT-шешімдерімен, аудит объектілерін іріктеу тәуекелдерін басқару жүйесімен, аудиторлық процесті ұйымдастырумен және әр жылдары жүргізілген аудит материалдарымен танысады. Шетелдік мамандар тақырыптық кездесулер мен кеңестерге де қатысады.

Жоғары аудиторлық палатаның мүшесі Расул Рахимов атап өткендей, Палата өз қызметінде ИНТОСАИ халықаралық стандарттарын сақтауға және тұрақты негізде үздік шетелдік тәжірибелерді енгізуге мүдделі.

«Біз ұлттық тәжірибемізді ескере отырып, әлемдік үрдістерді зерттейміз және ұстанамыз. Жоғары аудиторлық палата келген аудиторлық топтың табысты және тиімді жұмыс істеуі үшін жағдай жасайды», — деді Р. Рахимов.

Ақпарат көзі: Қазақстан Республикасының Жоғары аудиторлық палатасы