Қазақстанның Жоғары аудиторлық палатасы Азия жоғары аудит органдары ұйымы хатшылығының 2021-2023 жылдардағы қаржылық есептілік аудитінің қорытындыларын ұсынды. Таныстырылым Нью-Дели қаласында (Үндістан) 16-шы АЗОСАИ Ассамблеясы барысында өтті.

ҚР Жоғары аудиторлық палатасы осымен екінші рет тиісті Аудиторлық комитеттің мүшесі болып сайланды. Бұл жолы 48 елдің жоғары аудит органдары кіретін Ұйым хатшылығының шоттарына аудит Әзербайжан есеп палатасымен бірлесіп жүргізілді. Аудит биыл сәуірде Қытайдағы штаб-пәтерде өтті.

Аудит нәтижесі бойынша АЗОСАИ хатшылығының кәсібилігі мен қаржылық тәртібі жоғары деңгейде екені анықталды. Қаржылық есептілік IFRS және IPSAS халықаралық стандарттарына сәйкес жасалып, ұсынылды. Сонымен қатар Аудиторлық комитет мүшелері Ұйымның қорларын басқаруды одан әрі жақсарту бойынша өз ұсынымдарын берді.

Ассамблея шеңберінде АЗОСАИ хатшылығы мен жұмыс органдарының өкілдері өткен кезеңдегі атқарылған жұмыс туралы баяндады. Атап айтқанда, 2023 жылы Астана қаласында Экологиялық аудит жөніндегі жұмыс тобының 9-отырысы жоғары деңгейде өткені атап өтілді.

Сонымен қатар Расул Рахимов бастаған Жоғары аудиторлық палатаның делегациясы Үндістан, Индонезия, Корея, Ресей, Филиппин және Жапонияның жоғары аудит органдарының өкілдерімен екіжақты кездесулер және келіссөздер өткізді. Атап айтқанда, екіжақты ынтымақтастықты дамыту, мемлекеттік аудиторларды оқыту және кәсіби дамыту мәселелері талқыланды.

Бұдан басқа, Қазақстанның Жоғары аудиторлық палатасы Филиппиннің Аудит комитетімен Өзара түсіністік туралы меморандумға қол қойды.

Анықтама ретінде: Ассамблея АЗОСАИ-дың жоғары басқару органы болып табылады және үш жылда бір рет өткізіледі. Іс-шараның негізгі мақсаты Ұйымның қызметі туралы есептілікті ұсыну, білім алмасу, өңірлік және халықаралық деңгейде ынтымақтастықты нығайту болып табылады.

Ақпарат көзі: Қазақстан Республикасының Жоғары аудиторлық палатасы